✨ فوازير رمضان ✨
فوازير رمضان انتهت…بس ذكرياتها لسه عايشة جوانا لحد دلوقتي.
أول ما حد يقول فوازير رمضان…
على طول بييجي في بالنا فوازير “نيللي” و “شريهان” 💃✨
نيللي… بخفة ظلها وأناقتها وشريهان… باستعراضاتها المبهرة وشقاوتها ..
يمكن الفوازير اختفت مع مرور السنين…لكن إحساسها ما اختفاش جوانا .
إحساس رمضان زمان…لما كانت البيوت كلها تتجمع قدام التلفزيون…وتستنى الفوازير كل ليلة بشغف.
👈لكن المفاجأة ⁉️
إن فوازير رمضان ما بدأتش من التلفزيون أصلاً.
تعالى اقولك ازااى ⁉️
▪️ البداية كانت من الراديو 📻
في خمسينيات القرن الماضي…قدمت الإعلاميتان آمال فهمي و سامية صادق فكرة الفوازير في الراديو..
كان السؤال بسيط…واللي يعرف الإجابة يبعته في جواب بالبريد .
كانت فكرة بسيطة جدًا…لكنها صنعت حالة شغف يومية..وبقت طقس رمضاني عاش سنين طويلة.
👈 طيب… إزاي وصلت الفوازير للتلفزيون؟⁉️ 📺
▪️ بعد سنة واحدة من انطلاق التلفزيون المصري سنة 1961 ظهر برنامج “فوازير الأمثال”وكان عبارة عن مشهد تمثيلي قصير…والمشاهدين يحاولوا يخمنوا المثل الصحيح.
لكن الشكل اللي كلنا فاكرينه للفوازير…كان لسه في الطريق.
▪️ في سنة 1967 ..قدم المخرج محمد سالم فوازير جمعت بين التمثيل والاستعراض بمشاركة فرقة ثلاثي أضواء المسرح : (سمير غانم – جورج سيدهم – الضيف أحمد).
ومن هنا بدأت الفوازير بالشكل اللي عرفناه:
أغنية… واستعراض… وملابس مبهجة…
وفي النهاية لغز يخلي كل الناس تفكر.
▪️ من 1975 لحد 1981 ارتبطت الفوازير باسم الفنانة نيللي تحت قيادة المخرج المبدع فهمي عبدالحميد.
كل موسم كان له فكرة مختلفة…استعراضات خفيفة وأنيقة..وأزياء مبهجة ..وفزورة يومية مكتوبة ببساطة وذكاء.
ومن أشهر فوازيرها وقتها:
✨ الخاطبة
✨ عالم ورق
وساعتها بقى…رمضان من غير فوازير نيللي كان كأنه ناقص حاجة.
▪️ من 1982 إلى 1984 ظهر سمير غانم بشخصية “فطوطة” الشهيرة ببدلتها الخضرا وروحها الكوميدية.
الشخصية دي خطفت قلوب الأطفال والكبار…
وبقت واحدة من أيقونات رمضان اللي ما بتتنسيش لغاية النهاردة .
▪️ ومن 1983 إلى 1988 ..جت شريهان…
ونقلت الفوازير لمرحلة جديدة تمامًا..استعراضات ضخمة..أزياء فخمة..رقصات مبهرة..وألغاز محتاجة تركيز..
خصوصًا فوازير “ألف ليلة وليلة” ..اللي كانت حديث الناس كل يوم في رمضان وقتها .
▪️ وفي سنة 1988 ..ظهرت “فوازير المناسبات”
بطولة يحيى الفخراني ومعه صابرين وهالة فؤاد.
وكانت أقرب لمسلسل كوميدي ..كل حلقة تحكي عن مناسبة مصرية وعاداتها.
▪️ وفي التسعينات ..
✨ نيللي رجعت بفوازير “عجايب صندوق الدنيا” و”أم العريف”.
✨ وشريهان رجعت بفوازير “حاجات ومحتاجات”.
▪️لكن مع مرور الوقت…ظهرت محاولات جديدة للفوازير..بس الحقيقة إن البريق اللي صنعته الفترة دي
ما رجعش بنفس القوة.
وبدأت الفوازير تختفي تدريجيًا من خريطة برامج رمضان.
✨ لكن الذكريات ما بتختفيش ..يمكن الفوازير اختفت من الشاشة ..لكنها فضلت محفورة في الذاكرة.
لأنها ما كانتش مجرد برنامج..دي كانت جزء من طقوس رمضان زمان.
وعشان كده…
كل ما ييجي رمضان ..ترجع معاه الذكريات الجميلة دي.
ذكريات زمن..كانت فيه البهجة جاية من أبسط الأشياء.🤍✨
Hits: 3