هل أخدت بالك وانت ماشي أو راكب فى شارع قناه السويس اللي هو مدخل اسكندرية من اتجاه الطريق الصحراوى تحس انك ماشي فى منطقة منخفضة ويمينها وشمالها جوانب عاليه وكإنك ماشي فى قاع مجري مائي أو ترعة ؟
لو حسيت بكده فأنت صح 👌
هى فعلا كانت ترعة واسمها (ترعة الفرخة)
تعالوا بقي نعرف اية ترعة الفرخة دى
ترعة الفرخة اتحفرت سنه ١٨٦٠ فى عهد الخديوي اسماعيل وكانت بتودى المياه لأول محطة لتنقية المياه بالاسكندرية اللى هى وابور المياه …. أصل الاسكندرانية كانوا بيقولو على اى ماكينة (وابور)
المهم.. المية توصل للمحطة أما بقية مياه الترعة فبتكمل طريقها وتنزل فى الشلالات.
الترعة اللي بنتكلم عليها دى كان ليها جانبين جانب منهم كان سكانه فى الخمسينات خواجات، والطبقة المتوسطة المصرية، زى الأديب ألفريد فرج، والأديب لورانس داريل، صاحب رواية «رباعية الإسكندرية».
أما الجانب التاني فكان فيه عزبة الفرخة. بيسكنها الناس اللى مش هاى، يعنى الحرافيش على رأى نجيبنا محفوظ. كانت عزبة ترابية على هيئة مثلث متساوى الأضلاع، كل ضلع بسور. سور الترعة، سور السكة الحديد، وسور سجن الحضرة.
العزبة كان بيسكنها النوبيون، والصعايدة، والبحاروة،
وطبعا فى الوقت ده كانت اسكندرية لسه ملهاش طريق صحراوي كله زراعى لكن لما اتعمل الطريق الصحراوى قرروا يجففوا ترعة الفرخة والمياه توصل وابور المياه فى ماسورة
ويعملو الترعة طريق يدخل على إسكندرية
قوم عملوا طريق قناة السويس عشان كده وانت ماشى فى طريق قناة السويس تبقى ماشى فى قاع الترعة والجانبين عاليين وكلهم زرع والكوبرى اللى فوقيه القطر كان كوبرى على الترعة.
لما تبص ع الخريطة هتلاقى الموقف الجديد كان جزء من شاطئ بحيرة مريوط
ومرور محرم بك كان جزء من شاطئء بحيرة مريوط
وكمان سلسلة كبارى محرم بك كانت جزء برضه من بحيرة مريوط
والحديقة الدولية و كارفور والمطار وعزبة المطار ونادى الصيد وطريق المطار كل ده جزء من بحيرة مريوط
الجزء الوحيد الباقى من بحيرة مريوط فى هذه المنطقة هو بحيرة المطار
وتمتد البحيرة إلى بوابة أبيس وكل قرى أبيس اراض مستصلحة من بحيرة مريوط أو كانت ضفاف لبحيرة مريوط.
تابعونا …..لسه عندنا معلومات جديدة وحلوة عن اسكندرية الجميلة