👋🏻بنرحب بكل متابعينا
🌀 النهاردة هنكمل معاكم بوست الجالية اليونانية و حنحكيلكم 3 قصص جديدة عن اليونانيين السكندريين ، احنا روحنا مقر الجمعيه اليونانيه بالاسكندريه والتقينا مع ((Dimitris Cavouras)) نائب رئيس الجمعيه، وكان لقاء ممتع حكي لنا ازاى حصل الاختلاط المدهش بين الاسكندرانيين واليونانيين.
📝اول قصصنا النهاردة عن واحد اسمه ” ميخائيل توسيتساس” ، الراجل ده كانت عائلته في اليونان تجار وكان والده صاحب محمد علي، فكر ييجي مصر ويستثمر فيها، جه وقابل محمد علي باشا حاكم مصر وقتها، محمد علي شافه ذكي جدا وشاف ان هو ده الي حيساعده عشان يبني الدوله الحديثه اللى بيحلم بيها، الاتنين عملوا في مصر تنميه اقتصاديه واجتماعية في نفس الوقت.
توسيتساس قدم خدمات كتير للجاليه بتاعته و ساعد هو و رجال أعمال تانيين في بناء مدارس و مستشفيات وكنائس في الاسكندريه، توسيتساس زي ما بنقول كده هو “businessman ” شاطر ومن شطارته بقي مستشار محمد علي وبقي هو المسئول عن أول بنك مركزي مصري واول شركه ملاحه و مسئول عن اراضي كتيره مش بس كده ده كان اول قنصل لدوله اليونان في مصر و من مؤسسين الجمعيه اليونانيه بالاسكندريه.
📝 تاني قصصنا النهاردة
قصه الجمعيه اليونانيه نفسها، من اول ما تدخل المبني هتحس حقيقي انك ركبت آلة الزمن ورجعت لورا كتير ، الجمعيه اليونانيه مكانها في الشاطبي علي الترام فيها المدرسه اليوناني اللي بتتبع وزاره التربيه والتعليم اليونانيه، وفى دار مسنين، ومسرح ، ومطبخ لخدمه الأسر الفقيره ، وجيم للمدرسه.
مكنش ده مكانها الاول،
قصه الجمعيه تبدأ فى يوم ٢٥ أبريل سنه ١٨٤٣ م، اجتمع ميخائيل توسيتساس واكبر رجال الأعمال الي كانوا موجودين وقتها في دير سان سابا (كنيسه الجرس) في الاسكندريه و قرروا يبنوا كنيسه و مستشفي و مدرسه لخدمه الجاليه اليونانيه الي عايشه في الاسكندريه، وبنوا المدرسة واسمها مدرسة افيروف وبنوا المستشفي القديمه امام دير سانت سابا وكان اسمها المستشفى اليوناني وهى دلوقتي اتهدت وتم بناء مستشفى تاني من كوتزيكا وكان اسمها كوتزيكوا والمستشفى دى اتاممت فى سنه ١٩٥٦وبقت مستشفى جمال عبد الناصر وكمان بنواكنيسه البشارة اللى اسمها باليونانى كنيسة افنجلسموس في المنشيه.
الكنيسه دي اتبنت علي مراحل، وكل اهل اليونانيين الي كانو عايشين في اسكندريه عملوا تطويرات للكنيسه لحد ما أصبح شكلها ما هو عليه دلوقتي وبقت أكبر كنيسه للروم الأرثوذوكس في الشرق الأوسط، كان أعضاء الجمعيه عندهم عدد كبير من المحلات و المصانع والمتاجر والمطاعم و المسارح….الخ واسسوا انديه رياضيه و فنيه وادبيه.
وكل ما ازدهرت الاوضاع الماديه للجمعيه كل ما انتشرت انشطتها المختلفه وكمان اعمالها الخيريه. كل رؤساء الجمعيه اللي تولوا إدارتها كان اهم أهدافهم هي أعمال الخير والاحسان اللي بتقوم بيها الجمعيه، بعدها اتنقلت كل المكاتب التابعه للجاليه الي المربع اليوناني بمنطقه الشاطبي ، الجمعيه بقالها ١٩٧ سنه شغاله أعمال خير بدون توقف وبكده تكون اقدم مؤسسه خيريه في مصر.
📝القصه الثالثه هي قصه ديميتري كافوراس نائب رئيس الجاليه اليونانيه في اسكندريه، ديميتري مثال لليوناني الاسكندراني الاصيل، اسكندراني ابا عن جد ، لما سألناه ليه اليونانيين السكندريين لسه في منهم أعداد كبيره مش عايزه ترجع اليونان؟ كان رده “ترجع فين ده هنا اصلنا وفصلنا ممكن اليوناني السكندري يروح زياره….. بس فى الاخر ولاءه لبيته لازم يرجع تاني بلده” ، فيه يونانيين اسكندرانيين معاهم جنسيات كتيره بس هما حابين يعيشوا في مصر بيحبوا مصر، وبدأ يكلمنا عن نفسه ان كل اجداده اتولدوا في مصر جدته اتولدت في بورتوفيق وجده اتولد في اسكندريه ووالد جدته كان بيشتغل في قناه السويس وقالنا بالمناسبة بعد تأميم القناه تاني يوم الانجليز والفرنساويين مشوا لكن اليونانيين كملوا شغل في بلدهم وكملوا شغلهم بالقناه، وبالمناسبة فى اقاويل كتير انتشرت ان جمال عبد الناصر طرد اليونانيين من مصر الكلام داه غلط جدا ، اليونانيين مشوا لان مكنش فيه في مصر امتيازات زي اللي ادهالهم محمد علي. وقال لنا ان والده ووالدته كمان اتولدوا في اسكندريه و هو كمان اتعلم فى اسكندرية وبعدها سافر انجلترا يكمل تعليمه الجامعي واشتغل فتره ورجع تاني الاسكندريه، وكمل وقال ان احنا بنعتبر نفسنا مصريين بثقافه يونانيه. ديميتري استقبلنا في مقر الجمعيه بكل الترحيب وحسن ضيافه …وحقيقي وجدنا فيه شخص مثقف ووطني، حامل مسئوليه الجمعيه وحريص علي استمرارها بتكملة اعمالها الخيريه هو وجميع أعضاء الجمعيه .
مجرد حديثه عن تاريخ الجاليه هتحس ان قد ايه الموضوع شيق ومهم في تاريخ اسكندريه، من هنا بنحب نشكره ونقوله اننا فخورين بوجودكم معانا.
الاسكندرية مدينة كل الأعراق ومجمع لكل الثقافات
Hits: 8