👈 في إسكندرية…
مش كل الكنوز مدفونة تحت الأرض..
في كنوز واقفة على رجليها شامخة
ناس كتير بتعدّي قدّامها كل يوم
وقليل اووى اللي يعرف قيمتها 👀
👣 وإنت ماشي في شارع السلطان حسين – منطقة الفراعنة بالحي اللاتيني..
هتلاقي.. ڤيلا واقفة من أكتر من 125 سنة ..شايلة أسرار وحافظة حكايات وشاهدة على تاريخ مدينة كاملة…
دي “فيلا إدوين جور” ..اللي اسمها دلوقتي ڤيلا “أبو الفضل ”
بيت لو وقفت قدّامه دقيقة.. هتحس إن الزمن رجع خطوة لورا ⏳
👈 تعالى بقى نرجع بالزمن شوية…
سنة 1895 .. الڤيلا دي اتبنت وصمّمها المهندس اليوناني “جاربيس جريباري” على الطراز القوطي الحديث طراز تحسّه خارج من رواية أوروبية قديمة
بس اختار يقف هنا ..على أرض إسكندرية .
🏛️ صاحبها كان” چوزيف جورا” أو “چوزيف جوهر ” زي ما كان معروف وقتها .. واحد من أهم الشخصيات الإنجليزية اليهودية في أواخر القرن الـ19 ..
تاجر كبير في الفحم والقطن وبذوره ..اسم له وزنه… ووجوده كان واضح في المدينة.
🏛️ سنة 1909 ..الحكاية كملت مع الابن “أدوين جور”
استلم شركة والده وغيّر اسمها لـ “أدوين جور وأولاده”
وكبرها ..من تجارة القطن… للحرير… للسجاد
للأراضي الزراعية… للعقارات .
👈بس اللي مش عارفينه بقى⁉️
ان أدوين جور كان محُب للخير ..تبرّع بنص مساحة أرض فيكتوريا كولدج ..وشارك في إدارة مؤسسات كبيرة زي فيكتوريا كولدج و مدرسة EGC و بورصة مينا البصل ..وكمان بلدية الإسكندرية.
🏅🏅 واتكرّم بأوسمة رفيعة منها وسام النيل
ووسام الشرف برتبة فارس .
ورحل سنة 1968وساب وراه سيرة… وبيت لسه بيتكلم.
🏛️ جوه الڤيلا هنلاقى ..
تحف ، أنتيكات ، ومقتنيات نادرة
وبرّه هنلاقى ..
جنينة فيها نباتات نادرة 🌿
🏛️ النهارده اسمها ڤيلا أبو الفضل نسبة لمُلّاكها الحاليين.
✨ ودي كانت حكاية النهاردة..حكاية من قلب إسكندرية ..
و استنونا دايمًا ..في حكايات وقصص مميزة
عن إسكندرية… وتراثها… وعراقتها. 🙋♀️
Hits: 14