بحرى وناس بحرى…. اللي هم اصل اسكندرية…. لو انت ساكن فى بحرى قولنا يا ترى ساكن فى جزيرة فاروس ولاعند الجسر ؟؟؟؟
لو مش فاهم انا بقول اية… تعالي معايا ارجعك بالزمن شوية كتير لورا .
🔻لما جه الاسكندر الاكبر لمصر وحب يبني مدينه الإسكندرية مكانتش الأرض صحرا فى الوقت داه ….لأ… كان فيه فى الشرق عند ابو قير مدينتين صغيرين واحدة اسمها كانوبوس، والتانية اسمها ثونيس-هيراكليون اللى هما الاثار الغارقة دلوقتي فى ابو قير وفى الغرب كان فى 14قرية صغيرة أكبرهم قرية (رع قدتى) اللي هى بالاغريقي( راكوتيس) وبالعربي (راقودة) ودى القرية اللى بدأ منها الاسكندر الاكبر تخطيطه لمدينه.. الإسكندرية
▪️المهم في حكايتنا ان القرية دى كان قدامها جزيرة فى البحر اسمها جزيرة فاروس وكان فيها ناس عايشة وليها مينا قام عمل جسر بين القرية والجزيرة .
اية بقي الجسر داه
الجسر ده دلوقتي مكانه بقي شارع اسماعيل صبري اللي بيبدأ من عند قهوة فاروق اللى قدام محمد حامد الجزار ويفضل الجسر مكمل لحد مقام سيدى العدوى ومبني هيئة السلامة البحرية بعد مطعم صواريخ بتاع الفول وداه الشارع الوحيد المستقيم اللى بيربط المينا الشرقى بالمينا الغربي…… الجسر داه لما بناه الاسكندر كان اسمه (هيبتا ستاد) وهيبتا معناها بالاغريقي رقم 7 اما ستاد دى وحدة قياس إغريقية والاستاد الواحد طوله 185متر يبقي كدة طول الجسر أو شارع اسماعيل صبرى كام؟
يقي 1295متر يعني لو حضرتك ساكن عند قهوة السمان تبقي عند الجسر ولو عند محمد حامد تبقي ساكن فى جزيرة فاروس.
عشان كده…بنقول ان ناس بحري دول اصل اسكندرية .