🏛️ مش كل فيلا قديمة تبقى مجرد مبنى…
فيه فيلل ليها فى الأصل حكاية ..
وسط شوارع إسكندرية الهادية..
تقف فيلا «جانوتي» مش بس كتحفة معمارية نادرة .. لا ديه كمان تُخفي وراها سر غير شكل المدينة 👀
👈اللى مش عارفينه⁉️
ان الفيلا صاحبها «جانوتي» هو صاحب فكرة أول أتوبيس نقل جماعي في مصر 🚌
👈طب إيه الحكاية ؟⁉️
الحكاية بدأت مع الإيطالي “فيتوريو جانوتي” واحد من كبار تجار البترول في أوائل القرن العشرين..
واللي قرر سنة 1920 يدخل فكرة جديدة على البلد…
وهى نقل الناس في أتوبيسات عامة.
⬅️البداية كانت بسيطة جدًا:
أتوبيسين بس ماشيين من ميدان المنشية لحد ميدان سيدي جابر بأجر:
▪️ 15 مليم للدرجة التانية
▪️ 25 مليم للدرجة الأولى
بس الفكرة نجحت…وكبرت بسرعة لحد ما وصل عدد الأتوبيسات لـ 50 أتوبيس في آخر التلاتينات
ومن هنا.. 👇👇
من إسكندرية الرحلة بدأت..وكملت بعدها بسنتين ووصلت القاهرة.
👈نرجع بقى لفيلا “جانوتي” نفسها ..
🏛️ اتبنت فيلا “جانوتي” سنة 1926 ..بتصميم المهندس الإيطالي “جياكومو إليساندرو لوريا”
اللى وُلد في مدينة المنصورة.. واختار إسكندرية تكون مسرح إبداعه..وهو نفس المعماري اللي ساب بصمته في
عمارة ميرامار – فندق سيسيل ..وغيرهم من علامات المدينة الخالدة.
📍 مكانها فين؟⁉️
🏛الفيلا موجودة في شارع يحيى حقي – زيزينيا
جنب قصر ” فاطمة حيدر ” اللي بقى دلوقتي قصر المجوهرات.
وبعد وفاة ” جانوتي” الفيلا انتقلت لبناته الثلاثة :
ماريا – لوردانا – رومولا
وبعدين اتباعت.. لحد ما آلت ملكيتها بعد كده لصاحب أحد المستشفيات الخاصة.
👈واللى مش عارفينه كمان 👀⁉️
ان “جانوتي” كان من ملاك عمارة “نيكولاس باراسكيفاس” اللى في شارع فؤاد
📌و اللى اتكلمنا عنها قبل كده ..👇👇
لو عايز تعرف قصتها ايه ..ده لينك البوست
https://www.facebook.com/share/p/1DHiEaN3Yt/
وكمان كان عنده مزرعة في حي الرمل ..لسه المنطقة معروفة بإسم عزبة جانوتي لحد النهاردة.
👈 وبكده نكون وصلنا لنهاية حكاية النهاردة ..
استنونا دايمًا في حكاية جديدة من حكايات إسكندرية 🙋♀️
💙 إسكندرية…مدينة كل مبنى فيها ..وراه حكاية تستاهل تتحكي 💙
Hits: 17