وهنا لازم نتكلم عن شخصيات مميزة فى تاريخ الإسكندرية معجونة بعشقها زي “سيد درويش” 👌👌
فى الوقت اللى الموسيقا العربية كانت فى سااابع نومة إتولد سيد البحر درويش فى حي كوم الدكة ١٨٩٢.٣.١٧ عشان يرجّعلها الحياة.
درس فى المعهد الديني ف أبو العباس ١٩٠٥ وبدأ يغني فى المقاهى السكندرية.
فى سن ال١٦ تزوج واضطرته الظروف المادية الصعبة للعمل فى البناء “عتال” وكان بيغني على السقالة ولما زادت حماسة و انتاجية العمال طلب منه المقاول التفرغ للغناء وبس مقابل نفس الأجر.
بالرغم من حياته القصيرة إلا إنه ترك روائع غيرت من شكل الموسيقى العربية واستخدمتها كرسالة بجانب التطريب.
أشهر روائعه:
زوروني كل سنة مرة،أنا المصري، الحلوة دي،خفيف الروح،شد الحزام،طلعت يا محلا نورها، أنا هويت وانتهيت، مخسوبكم داس ونشيد مصر القومي بلادي بلادي.
فى الوقت إللى مصر كانت بتحتفل برجوع سعد زغلول من منفاه على نغم درويش “مصرنا وطنا سعدها املنا ” توفى سيد درويش ١٩٢٣.٩.١٠
ومازالت موسيقاه حية فى قلوبنا .رحم الله مبدع الإسكندرية”سيد درويش