🤔يا تري تعرف ايه علاقة “منطقة سموحة”… الي في حي سموحة ب “شارع منشا”… الي في محرم بك ؟؟
كتير مننا عايش في ((سموحة و شارع منشا)) و بنستخدم الاسمين دول تقريبا يوميا في حياتنا و جه الوقت الي نعرف مين سموحة؟ و مين منشا؟….
🔆””سموحة و منشا”” اسماء لأكبر العائلات اليهودية الي عاشت بالإسكندرية… و اتسمت المنطقتين دول باسمهم ….
🌐 نبتدي ب عائلة سموحة
▪️اشهرهم چوزيف سموحة الي كان راجل اقتصاد و صناعة من الطراز الأول و جه مصر علشان يتاجر في القماش
و سنة ١٩٢٤ ابتدا يجفف بحيرة الحضرة الي كان اسمها ‘ملاحة رجب باشا’ علشان يأسس حي سموحة…
▪️كمان ساهم جوزيف سموحة في بناء المستشفي اليهودي لخدمة الطائفة اليهودية (مستشفي الطلبة بسبورتنج حاليا)…
▪️عائلة سموحة من أكبر العائلات اليهودية في الاسكندريه، أنشأوا مضارب الارز و تكرير السكر و الغزل و النسيج…
🌐 نروح ل عائلة منشا أو منَسَّى… منَسَّى ده الاسم الاصلي لانه اسم يهودي معروف و اتقال كتير في العهد القديم و المصريين قالوا منشا تسهيلا لهم..
▪️أشهرهم عميد العائلة البارون “يعقوب دي منَسَّى” الي اتولد في مصر سنة ١٨١٠ و مات في الاسكندريه سنة ١٨٨٣
▪️اشتغل صراف في مديرية الجيزة و كبر في شغله لحد ما وصل بقي (صراف باشا) للخديوي إسماعيل
▪️اشتهرت العائله بالتعامل مع الأموال ، و أنشأوا محال تجارية تحت اسم (بيت منَسَّى و اولاده) بالشراكة مع عائلة قطاوي في القاهرة و الاسكندرية… و اصبح لها فروع في مانشستر و ليفربول و لندن و باريس …
▪️ساهمت العائلة في بناء عدد من المستشفيات و المدارس في محرم بك، بعد وفاة يعقوب مسك ابنه اعمال الأسرة و نقلها من الأعمال المالية و المصرفية الي تجارة القطن و السكر المربحة…
🌐و أخيرا و ليس آخرا كل ما هتفتش في تاريخ إسكندرية كل ما هتلاقي معلومات جميلة و كتيرة… هتلاقي نفسك بتفرح و انت بتقراها و بتتعرف عليها … شاركونا بتعليقاتكم …