🎉 أيام قليلة وتبدأ اجازة نص السنة
🤲🤲كل الدعوات لأبنائنا واخواتنا الطلبة بالنجاح والتوفيق…
كتير من الأهالي فى الاوقات دى بتبقي عاوزة تكافئ ولادها بعد تعبهم فى المذاكرة وترتب فسح وسفر لمحافظات تانية عشان الكل يفصل ويتبسط ويستعد لإستقبال الترم التاني.
لكن السنة دى الوضع هيكون مختلف، ودا مش عندنا بس…. لكن علي مستوي العالم وبسبب الأزمة الأقتصادية..وأصبح الكل مطالب بإتباع سياسة تقشف والتفكير ف البدائل الأقل تكلفة.
وبشوية تفكير لقينا عندنا متنفس رائع يؤدى الغرض و تكلفتة تكاد تكون ضعيفة.
شواطئناااااا
ايوه شواطئنا اللي الٱلاف من سكان محافظات الجمهورية بيخططوا يسافروا وييجوا ليها ف الاجازات…ينفع بقه اننا نسيبها ونسافر؟؟
👍 عندنا شواطئ مجانية تماما …يعني دخول الشاطئ مجاني و الحصول علي كرسي وشمسية برضه مجاني.
وبالمناسبة….الشواطئ المجانية دي بتقدم مستوى جودة لايقل عن الشواطئ السياحية، وعندنا كمان شواطئ عامة رسم دخول الفرد خمسة جنيهات مقابل الحصول علي كرسي وشمسية واستعمال كافة المرافق.
🌞ده الصبح…ولو حابين نخرج بالليل🌠 هتلاقي أجمل شواطئ باسعار تذاكر تبدأ بخمسة جنيه للفرد وأعلي سعر تذكرة للشواطئ السياحية خمسة وعشرون جنيه للفرد وكمان مسموح بدخول المأكولات والمشروبات من الخارج..والشواطئ فيها كافتريات ومناطق العاب اطفال جميلة.
🫶🏻حابين كمان نفكركوا أنه بناء علي قرار السيد اللواء /محمد الشريف محافظ الإسكندرية، الشواطئ العامة مفتوحة مجانا لممارسة الرياضة⛹️ والتمشية🚶 والصيد
ثانيا :-بنفكركوا برضه بأننا لسه بنشجع الأمهات بعد ضغطة الإمتحانات تاخد ولادها وأصحابها وتروح علي الشواطئ العامة فى الأيام المشمسة من الإجازات ….و زي ما قولنا سعر تذكرة الدخول خمسة جنيه للفرد شاملة الحصول علي كرسي وشمسية🏖️ واستعمال المرافق….. ومتدفعوش☝️ اكتر من كدة وسيبوا الأولاد تطلع طاقتها وتغير جو بعد الإمتحانات وأنتوا إفصلوا بفسحة تكلفتها بسيطة لكن هتفرق معاكم .
متنسوش تاخدوا ساندويتشاتكم🥖🥖 وترمس الشاى بالنعناع☕☕ عشان متشتروش حاجة وتتكلفوا اكتر وبكدة تقدروا تكرروا الفسحة اكتر من مرة في اجازة نص السنة….
👬كمان لو انتم شباب وخلصتوا امتحانات الجامعة بنشجعكم تروحوا شاطئ اسحاق حلمي حتلاقوا ملاعب كرة قدم⚽ وملاعب راكيت🎾وكرة طائرة 🤾وكل التكلفة اللى هتتكلفوها تمن تذكرة الدخول خمسة عشر جنيه للفرد وكمان تقدر بعد ما تخلص لعب تقعد تحت شمسية قدام البحر مع اصحابك وتتصوروا وسجلوا احلي ذكريات …..
👭ولو بنات و اتجمعتوا مع بعض و حابين تنزلوا في مكان آمن و متدفعوش فلوس كتير و كمان تاخدوا احلي صور….مفيش احلي من بحر إسكندرية في الصور و التمشية و اكيد هتقضوا احلي وقت يغير مودكم و يخليكم ترجعوا للمذاكرة تاني بعد الاجازة بنفس مفتوحة 💓
اخيرا بكل الحب 💓بنوجه الدعوة لكل الجمعيات الخيرية ونقولهم منتظرينكم فى إجازة نص السنة مع أولادكم عشان نستمتع مع بعض زى أيام الصيف .
كل عام وكل المصريين بكل الخير .
🧐اخر حاجة بنقول إن من غير المقبول اننا نسمع من السكندريين انهم بقالهم سنيين مزاروش البحر بنقولهم انتوا وحشتوا شواطئ الإسكندرية جدا والشواطى مستنياكم…
افتكروا ان الادارة المركزية للسياحة والمصايف كل همها انكم تستمتعوا باوقاتكم علي الشواطئ وحنكون قريبين جدا منكم لو حد فكر يضايقكم….اتصال فقط وحتلاقونا معاكم ونضمن لكم انكم تقضوا يومكم وترجعوا وانتم فريش ومليانين طاقة إيجابية.
احنا رفعنا درجة استعدادنا وارقام تلقي الشكاوي منشورة اهيه 👇 مع اسعار تذاكر الشواطى.
بنتمني لكم اجازة سعيدة