بنرحب بكل متابعينا 🙋🏻♂️
النهاردة هنبتدي حكايتنا معاكم من السويد 🇸🇪
كان في واحد إسمه {{كارل فيلهلم فون جربر}} إتولد في السويد 🇸🇪 وكان تاجر أخشاب وفي يوم من الأيام قرر إنه يسيب السويد ويجي مصر تحديدًا بلدنا إسكندرية 🌊
وإستقر هنا وبني قصر كبير على الطراز الفلورنسي على البحر 🌊🏫 بين بحري والمنشية ده كان سنة ١٩٢٣
🏫 سنة ١٩٢٥ أتعين قنصل للسويد وده طبعا مع شغله الأساسي تجارة الأخشاب وكان يمتلك مصنع للكبربت في المكس وفضل محتفظ بلقب قنصل حتى بعد ما تقاعد.
🫅🧑💻🧑🏫 كان بيستضيف في القصر صفوة الإسكندرانية من رجال أعمال ومثقفين ودبلوماسيين وبيعمل حفلات في القصر اللي أشتهر وقتها ب {{قصر السويد}}
🏫 قبل وفاته ب ٧ شهور قرر إنه يتبرع بجزء من القصر عشان يكون كنيسة للبحارة السويديين اللي بيجوا لإسكندرية وخصص دور من أدوار القصر إنه يكون مدرسة ترعى الصم والبكم.
🏫 وفي آخر سنة ١٩٥٩ للأسف لقوه مقتول في دورة مياه القصر ووفاته دي لحد النهاردة لغز كبير وإتقالت أساطير كتير عن لغز وفاته 😔
🏫 إتحول القصر لمقر المعهد السويدي يتبع وزارة الخارجية السويدية وإترمم بالألوان الذهبى والأزرق الوان علم السويد 🇸🇪 وده كان سنة ١٩٩٩ وتم إفتتاحه بعد الترميم سنة ٢٠٠٠.
🏫 سنة ٢٠١٨ إكتشفوا في القصر مكان فيه آثار من العصر اليوناني الرومانى وعصور مختلفة عبارة عن عملات معدنية وبقايا قطع خزفية ومسارج ( أداه كانت بيتم إستخدامها زمان في الإضاءة) ومقتنيات مؤسس المعهد (نياشين ترجع لعصر محمد على باشا) وميداليات وأوسمة وجواز سفر ووسام بطريركية اليوناني ودبوس مميز بيرجع للملك فاروق وهو من الهدايا اللي كان بيتم إهدائها فى حفلات الزفاف و كانت تخص حفل زفاف الملك فاروق على الملكة فريدة وإتسلمت كل المقتنيات للسلطات المصرية ووزارة الآثار.
📜وفي سنة ٢٠٢٠ أصدرت الحكومة السويدية قرار نهائي بإغلاقه وسنة ٢٠٢٣ تم عرض المقتنيات اللي تم اكتشافها في معرض خبيئة ٢٦٤ لمدة شهر في متحف الإسكندرية القومى في حضور السفير السويدي (هوكان إيمسجورد) ومدير المتحف القومي وعدد من قناصل الدول الأجنبية وأساتذة التراث.
📋واتسمي المعرض بإسم خبيئة ٢٦٤ وده بيرجع لعنوان المبنى التجاري لتجارة الأخشاب اللي كارل جربر صاحبها في الورديان غرب إسكندرية.
🏫 حاليا القصر هو المقر الرئيسي لمؤسسة انا ليندا الأورومتوسطية للحوار بين الثقافات.
من السويد 🇸🇪 لإسكندرية خلصت حكاية النهاردة ونتمني تتابعونا دايما عشان تعرفوا اكتر عن إسكندرية 🌊 وأسرارها 💬
Hits: 15