ليه مافكرتش لما عامل التحصيل اللي علي بوابة الشاطئ طلب منك اكتر من تمن التذكرة انك تتصل بينا؟ طيب انت عارف ان سعر تذكرة الدخول مكتوب ع البوابات..ولو مش عارف افكرك :- لو الشاطئ من نوع الشواطئ العامة زي ميامي العام والسرايا العام وجليم العام والانفوشي العام والمكس العام وشهر العسل العام والهانوفيل العام .فده سعر تذكرته ٥ جنيهات للفرد شاملة شمسية وكرسي والخدمات مجانا (حمامات وتغيير ملابس). لو الشاطئ من نوع الشواطئ (الخدمة لمن يطلبها) والعبارة دي حتلاقيها ع البوابات جنب اسم الشاطئ فالتذكرة قيمتها ١٠ جنيهات شاملة الخدمات برضه لو الشاطئ من نوع الشواطئ المميزة فالتذكرة قيمتها ١٥ جنيه شاملة كل الخدمات برضه وطبعا بالشمسية والكرسي. لو الشاطئ من نوع السياحي فالتذكرة ب ٢٥ جنيه شاملة برضه كل حاجة. ركز بقه ف نقطة :- ان فئة الشاطئ اللي بتحدد سعر تذكرته بتكون مكتوبة ع البوابة جنب الاسم وجنبها سعر التذكرة فبلاش حد يخليك تدفع اكتر . طيب دخلت مع اسرتك بسلام ودفعت مظبوط بدون مغالاة .. احتمال يظهر لك شخص طماع في صورة عامل شماسي يفرض عليك تدفع اكرامية. الاكرامية مختلفة تماما عن التيبس والبقشيش…لانها مش بالرضا….دي بالغصب والاجبار واحيانا بالإهانة واحنا بنحاربها وعايزينك بصراحة انك تساعدنا . اوعي تدفع حاجة بدون ماتكون راضي عنها. بلاش تدفع وبعدين لما تروح بيتك بالليل تشتكي لانك كده مش بتحل المشكلة ..انت بتورط غيرك وبتخلي الطماع يتمادي في جشعه. لو فرض عليك اي شخص اكرامية قول له العبارة دي :- انا ح ابلغ الإدارة المركزية للسياحة والمصايف لو جنح للسلم وتراجع …فأهلا وسهلا لو تجاوز معاك بأي شكل مثلا:- – تعدي عليك لفظيا – ماقدمش الخدمة كاملة ليك – حط شمسية واتنين ادامك علشان يعاقبك لأنك تمسكت بحقك – اي تجاوز تحس انك ما اخدتش حقك فيه واتظلمت لاااااازم تكلمنا لازم تكلمنا لازم تكلمنا في حينه في حينه في حينه في دقايق حتلاقينا عندك…..وغيرك جربنا كتير وكنا عند حسن الظن وما تأخرناش حتلاقينا عندك ونضمن لك حقك تالت ومتلت ونضمن لك كمان مفيش اي انسان ممكن يتجاوز معاك علي الاطلاق. احنا جهة حكومية وبنمثل هيبة الدولة في شغلنا. هدفنا خدمة المواطن ولن نتراجع . بس ساعدنا واتصل وقتها…ارجوك ساعدنا علشان نتخلص تماما من الآفة دي اتصل بس مش بعدها….اتصل وقتها شواطئ اسكندرية للاستجمام مش للاستغلال. تمنياتي بصيف سعيد مع تحيات رئيس الادارة المركزية للسياحة والمصايف