ترعة المحمودية

04 ديسمبر 2025

🛣️كلنا النهاردة بنعدي من على محور المحمودية، وأوقات كتير بنفضل الطريق ده للسهولة المرورية فيه عن بقية الطرق في إسكندرية.🚐
🛣️طيب تعرف إن من كام سنة بس الطريق ده كان عبارة عن طريقين وبينهم ترعة مياه عذبة جاية من النيل؟
دي ترعة المحمودية…
مين حفرها؟ وليه؟ وإيه اللي حصل لها عبر السنين؟
تعالوا نرجع بالزمن ونعرف الحكاية من أولها.

⛲️ترعة المحمودية هي ممر مائي فرعي من نهر النيل كان بيمر عبر إسكندرية وينتهي في البحر الأبيض المتوسط.
امر بحفرها محمد علي باشا يوم 8 مايو سنة 1807 ، وكان الهدف الرئيسي إنه يوصل💧 مياه النيل لإسكندرية اللي كانت بتعاني من نقص المياه العذبة وقتها.
🌊وخلال أعمال الحفر ظهرت مساكن مطمورة وحمامات قديمة وقطع نحاس تاريخية، لكن المشروع اتوقف سنة 1819 بسبب انتشار الطاعون وعاد العمال لبلادهم.
💧وبعدها اكتمل الحفر واتفتحت الترعة رسميًا سنة 1820، ووقتها كانت بمثابة شريان حياة؛ مصدر مياه نظيف، وطريق ملاحي ضخم بين النيل وميناء إسكندرية، غير إنها كانت بتروي آلاف الأفدنة اللي على جانبيها.
و اتسمت “ترعة المحمودية” علي اسم السلطان العثماني محمود الثاني، صهر محمد علي باشا…

🚢عشرات السنين كانت الترعة دي رمز التجارة والحركة… مراكب ماشية، غلال وبضايع رايحة جاية، وصوت المياه اللي كان بيجمع بين روح البحر والنيل في مدينة واحدة.

ومع مرور الوقت بدأت الترعة تتعب؛ من السبعينيات لحد التسعينيات اتردمت أجزاء كبيرة داخل الكتلة السكنية في إسكندرية بسبب التلوث وزيادة السكان وضعف النقل النهري وانتشار العشوائيات حوالين المجرى، وبقت صورتها مش زي أيام زمان.

🛣️لحد ما جه وقت التطوير الكبير… من 2018 لحد 2020 اتنفذ مشروع محور المحمودية اللي غيّر شكل المنطقة بالكامل.
اتردمت الأجزاء اللي ما بقاش ليها فائدة، اتعملت كباري حديثة، اتفتح شريان مروري بيخدم المدينة من أولها لآخرها، واتشالت تعديات عمرها سنين واتطورت مناطق كاملة كانت مهملة حوالين الترعة.
ورغم التغيير ده، مهم نعرف إن الترعة نفسها ما اختفتش كلها؛ الجزء اللي خارج إسكندرية، خصوصًا في محافظة البحيرة، لسه موجود وبيشتغل في ري الأراضي لحد دلوقتي.

🛣️💧وفي النهاية…ترعة المحمودية مش مجرد مجرى مائي اتردم، ولا مجرد طريق اتفتح.
دي قصة مدينة، صوت قديم لسه عايش في صورة محور حديث، ولسه بيخدم أهل إسكندرية كل يوم… بس بشكل جديد يليق بتاريخها

مسابقة من أنا ؟

يوسف افندي

ريا و سكينة

فيس بوك

اتصل بنا

رقم 1 الشكاوي

رقم 2 الشكاوي

قدم شكوي