اليوم العالمي للمصايد 🎣🌍
21 نوفمبر
النهارده العالم كله بيحتفل بـ اليوم العالمي للمصايد… اليوم اللي اتأسس في أوائل التسعينات لما منظمات دولية بدأت تدق ناقوس الخطر بسبب تدهور المخزون السمكي في بحار كتير حوالين العالم.
ولأن “المصايد” بتمثل مصدر غذاء ورزق لملايين البشر… اتحدد يوم 21 نوفمبر علشان يكون مناسبة للتوعية، وتحريك الحكومات والمجتمعات لحماية الثروة السمكية.
واتسمّى باسم اليوم العالمي للمصايد لأنه مش بس عن “الصيد”… لكن عن كل المنظومة اللي بتحافظ على البحر وحياته وتوازن البيئة البحرية.
والحقيقة إن البحر عمره ما كان مجرد منظر… البحر حياة كاملة، ورزق، وثقافة، وذاكرة لناس كتير… خصوصاً هنا في إسكندرية اللي علاقتها بالبحر علاقة عشق من سنين.
وفي اليوم ده بنفكر نفسنا قد إيه مهم إننا نحافظ على البحر…
مش علشان السمك بس، لكن علشان أجيال جاية تستحق بحر نظيف وثروة سمكية مستدامة.
ودور محافظة الإسكندرية في الموضوع ده واضح جداً خلال السنوات اللي فاتت:
زى زيادة الحملات التوعوية على الشواطئ، وخاصة في موسم الصيف، علشان نشر الوعي عند الرواد بعدم إلقاء المخلفات في البحر.
تنفيذ حملات توعويه للطلبة والشباب لتعريفهم أشكال التلوث وأثرها على الكائنات البحرية.
دعم مبادرات جمع المخلفات من الشواطئ بالتعاون مع المجتمع المدني والمتطوعين.
نشر رسائل توعوية مستمرة عن أهمية الصيد المستدام وعدم الإضرار بالبيئة البحرية.
متابعة مستمرة من الإدارات المختصة لضبط أي مخالفات بتأثر على نظافة الشواطئ وجودة المياه.
الإسكندرية دايمًا سبّاقة في نشر الوعي بين الأهالي والطلبة… لأن محافظة الأسكندرية مؤمنة إن حماية البحر مش مسؤولية جهة واحدة، دي مسؤولية مجتمع كامل.
وفي اليوم العالمي للمصايد… بنأكد إن البحر أمانة، وإن كل واحد فينا مسئول يحافظ عليه ويقلل المخلفات، ويدعم الصياد المصري اللي بيصحي مع أول ضوء علشان يحافظ على رزقه ورزق ولاده.
كل سنة وبحرنا بخير… وكل سنة وإسكندرية نموذج للوعي وحماية البيئة البحرية 🌊💙
Hits: 39