🩸روحت الجونة؟؟؟مش اللي ف الغردقة لأ….نقصد اللي عندنا هنا ف اسكندرية.▪️ايه الكلام دا !!!!🤔عشان تعرف التفاصيل كمل قراية البوست للآخر .▪️اكيد حضرتك هتتفاجئ إن إسكندرية فيها جونة ومش جونة واحدة… فيها تلاتة جونة .١-جونة الخربان ٢–جونة جليمونوبلو ٣-جونة ستانلي 👆كلمة جونه يعني خليج طبيعي او كيرف في الساحل …ميه البحر بتدخل فيه.اول جونة هي جونة الخربان وهي المنطقة المحصورة بين نادى المهندسين ومطعم السرايا اللي علي بداية كوبري ستانلي، واتسمى خليج الخربان لانه كان خطر بسبب تياراته ودواماته وارتفاع امواجه والاهم من كده إنه ماكنش فيه مكان آمن للنزول أو الطلوع من البحر فى المنطقة دى وعشان كدة سموه الخربان. وبرغم كل الخطورة دى كان شباب اسكندرية بيحب يغطس فى الجزء ده. وفضل الخربان علي حاله لحد ما جت نقابة المهندسين وعملت حاجز امواج فى الجزء ده بعد توسعة الكورنيش .▪️وكان فى المنطقة دى كمان شاليه راهبات نوتردام ديو سيون زى ما هو واضح فى الصور ودول جم مصر سنة 1880 وليهم مدرسة ودير فى جليم علي شارع ابو قير والراهبات كانوا بيجيبوا الأيتام خاصة من الصعيد ويفسحوهم فى الشاليه بتاعهم ع البحر .اما الجونة التانية جونة جليم هتلاقيها باينه فى صورة رقم اتنين وفى الخريطة.اخر جونة هى جونة ستانلي زى ما هو واضح فى الصورة الثالثة . وبكدة لما تبص علي الخريطة المرفقة هتلاقي تلاتة خلجان او جون علي ساحل اسكندرية الممتد من المنتزة حتي المينا الشرقي بطول سبعة عشر ونصف كيلومتر…عايزين نأكد علي ان احنا هنا بنتكلم عن خلجان طبيعية نشأت من انحراف خط الساحل عن مساره الطبيعي وتكوين كيرف ..وليس الخلجان الناشئة عن اقامة حواجز والسنة بحرية من صنع الانسان.عرفت اماكنهم …..طيب لو انت قريب منهم زورهم واتمتع بالجمال الطبيعى .
Hits: 107