
صادفت من شوية الصورة دي لفيلل “فيني” في منطقة الحضرة في اسكندرية وتحديدا في الحلمية وهي الفلل الخاصة بالجالية الإيطالية اللي كانت مقيمة في الحضرة، وهي فيلات ذات تصميم مميز جدا لانها بلا ابواب بيوت! انت بتدخل الفيلا من البلكونة سواء مباشرة من الدور الارضي.. أو عن طريق سلم خارجي مميز جدا يوصل البلكونة لسكان الدور الثاني.
وبالكلام عن الجالية الإيطالية في اسكندرية فعدد غير قليل منهم سكن منطقة الحضرة اللي هي واحدة من اكتر المناطق الشعبية و اللي كانت مركز لنشاطهم الكبير في اسكندرية اللي ارتبط بالمصانع اللي عرفت طريقها على ضفاف ترعة المحمودية وكانت المنطقة الصناعية الأهم ( جنب الفيلل دي على طول مثلا مصنع شركة كورونا اول شركة شيكولاته في مصر واللي أسسها اليوناني تومي خريستو اللي جاب الصناعة دي الاسكندرية ).
الطليان افتتحوا أول شركة إنتاج سينمائي في تاريخ مصر وأول ستوديوهات تصوير في الحضرة سنة ١٩٠٢ ما بين جراج البلدية وكوبري المنارة وتحديدا المكان اللي أصبح سينما الحضرة فيما بعد سنة ١٩٠٢، وكانوا اول من دعم أول ممثل مصري وهو الممثل والمخرج محمد كريم.( سينما الحضرة أزيلت في التسعينات وبني مكانها عدد من العمارات ).
في الحضرة افتتح الطليان مستشفاهم الأهم للجالية في المدينة مستشفى “بينيتو موسوليني” – المستشفى الايطالي فيما بعد الحرب العالمية الثانية- واللي هي تحفة معمارية جميلة تضاف لسلسلة لمساتهم المعمارية الجميلة في اسكندرية واللي بس لا تقتصر على عمارات محطة الرمل والمنشية واللي مبانيها تحمل بصمات معمارييهم واللي بعضها استوحى من العمارة المميزة للبيوت في فينيسيا وتحديدا عمارات محطة الرمل الحمراء الشهيرة بين الترام والبحر.
كمان وصل أثرهم المعماري المساجد علشان يكون مسجد ابو العباس و القائد إبراهيم من تصميمات المعماري الإيطالي الشهير ماريو روسي واللي ارتبط اسمه بالملكين فؤاد وفاروق واعتبر معمارييهما الخاص .. وحتى بعد رحيلهم آثر البقاء في مصر بعد ما كان اشهر إسلامه ومازال عدد من أحفاده عايشين في الإسكندرية حتى اليوم
Hits: 351