اهلا بمتابعينا الكرام ورمضان كريم علي حضراتكم جميعا…معانا النهاردة حوار مهم بين الادارة و احد المواطنين ..قررنا ننشره لان نشره إفاده للجميع، ومنتظرين زي ما اتعودنا تعليقاتكم عشان نفيد بعض اكتر.—————————————————————————-
▪️مساء الخير ، الادارة المركزية للسياحة والمصايف ؟ ممكن أسأل حضرتك سؤال؟🔻مساء النور…. اهلا بحضرتك طبعا اتفضل يا افندم .▪️بصراحة نفسي تجاوبني وتفهمنى ازاى فيه قوايم اسعار ف محل سعر كوباية الشاى فيها 30جنيه وقوايم تانية ف مكان تاني سعر كوباية الشاى ب10جنيه معنى كدة لو المنشأة قدمت لك مقترح اسعار فيه ازازة ميه ب100جنيه مثلا هتوافق عليه ؟؟؟؟🔻 خليني افهمك الدنيا ماشية ازاى .اولا مصر عامة بتطبق نظام اقتصادى اسمه السوق الحر اللى بيعتمد علي المنافسة بين التجار كل تاجر يحدد السعر اللى هيبيع بيه والمواطن هو صاحب القرار أنه يشترى منه أو من المنشاة الأرخص .▪️هو ده بقه اللي انا عايز اتكلم فيه… داه انتوا كدة بتسلمونا للتجار يعملوا فينا زى ما هما عاوزين .🔻 لا طبعا خليني اسالك سؤال ليه حضرتك بتروح تشترى احتياجاتك من المؤسسات الكبيرة والهايبرات؟. أكيد لانها بتعمل عروض وبتقدم تخفيضات وعشان كدة بيبقى عليها اقبال وطلب اكتر وداه بيخليها تقدم عروض اكبر وتخفض فى اسعارها بشكل أكبر وده بيخلي باقى المنشآت تخاف علي وضعها الاقتصادى فتبدأ تقلل من اسعارها عشان تتخلص من مخزون البضاعة عندها وبكده تحصل المنافسة.يبقي من المنطلق داه المواطن هو الوحيد اللى يقدر يتحكم فى رفع أو انخفاض الاسعار يعني حضرتك لو لقيت كوباية الشاى فى منشاة ب30جنيه وفى منشاة تانية ب10جنيه يبقي لازم تروح للأرخص لحد ما الاغلي يقل الطلب عليه فيبقي مجبر أنه يقلل اسعاره….وكمان مقاطعة التعامل مع مقدمي الخدمات واصحاب المنشٱت اللي بتبيع بسعر عالي بيجيب نتيجة هايلة جدا.طيب ندخل فى نقطة تانيه اكيد بتفكر فيها وهى دور الدولة .دور الدوله هنا بيقتصر علي مراقبة الأوضاع داخل السوق والتدخل بشكل غير مباشر والتأكد من أن الاسعار المحددة هى اسعار موضوعة طبقا لقوى العرض والطلب وعشان كدة بتنزل كمنافس للتجار وبتحاول تقدم منتجات باسعار اقل وده بيخلق جو اكبر من المنافسة وبيجبر التجار علي تقليل اسعارهم .▪️طيب ليه السوق الحر وايه فوايده؟ .🔻فايدته الكبيرة هي خلق جو من المنافسة بين مقدمي الخدمة و التجار لمصلحة المواطن سواء كانت المنافسه علي السعر او جودة الخامة .وهنا لازم نوضح ان الدوله مش ح تلجأ للتسعير الجبري خلاص…وعلي فكرة برضه … نظام السوق الحر ده نظام اقتصادى مطبق فى كل العالم .طيب احنا كإدارة لما نعتمد اسعار الكافيهات ..هل احنا كده بنحدد قيمة وتسعيرة اجبارية؟؟؟طبعا لأ….احنا بنتناقش مع اصحاب المنشٱت علي مقترح اسعارهم وكتير من الاحيان بنرفضه وننزل بالقيمة …وبعد اعتمادها بننشرها للمواطنين ، والمواطن من حقه يفاضل ويختار مابين العروض(قوائم الأسعار)….وكمان يقاطع المنشأة اللي هو شايف (من وجهة نظره) ان اسعارها غير مناسبة وفيها تجاوز.احنا الحقيقة كان بيجيلنا تعليقات كتيرة بتقول اننا لما نكون فى المكان ، بنفتح المنيو ونتفاجئ بالاسعار ونتحرج جدا اننا نقوم ونسيب المكان…..وخاصة احنا داخلين علي شهر رمضان والسهر بقه والاقبال علي المطاعم والكافيهات حيبقي عالي. عشان كدة احنا عملنا موقع الإدارة ورفعنا عليه كل قوايم اسعار المنشات الخاضعة لرقابة وإشراف الإدارة وسيبنالك حرية الاختيار.؟ شوف القوايم قبل ما تنزل واختار المكان اللى اسعاره هتكون مناسبه لك وروح المكان واتمسك بحقك وادفع الاسعار المعلنة اللى هى تم تقديمها عن طريق صاحب المنشاة وتم مناقشتها عن طريق لجنه الاسعار وبعد الموافقة تم اعتمادها والالتزام بيها.انا كدة حاولت اوضحلك كل النقط اللى كانت بتدور فى راسك وكان نفسك تسأل فيها ولو فى حاجة مجاوبتش عليها ابعت كل استفساراتك وانا تحت امرك فى الرد والتوضيح .اوعي تنسي…..زيادة اقبالك علي منشأة او مقاطعتها هو الحل السحري للتحكم في الاسعار.شكرا جدا لمتابعتك لصفحة الإدارة …
Hits: 25