لو أول مرة تعرف إن في الإسكندرية ضريح اسمه سيدي ياقوت العرش، يبقى لسه ما سمعتش حكاية الحبشي اللي البحر جابه و عاش و اتعلم و اتثقف في الإسكندرية 🌍🌊
مين هو ياقوت العرش؟ وليه اتسمّى كده؟ وليه عندنا ضريح في إسكندرية باسمه؟ 🤔
سيدي ياقوت بن عبد الله الحبشي اتولد في بلاد الحبشة من حوالي 700 سنة. وجوده في إسكندرية جه بالصدفة، وما كانش ناوي يستقر فيها.
طيب و ده حصل إزاي؟
القصة بدأت لما واحد من تجار العبيد اشتراه، وكان راكب سفينة جاية على إسكندرية. لما المركب قربت من المدينة، البحر هاج وكانت خلاص هتغرق، بس عدّت على خير، وبعدها ياقوت استقر في إسكندرية 🚢
التاجر عرضه على الشيخ المرسي أبو العباس، فالشيخ خده واعتقه. بعد كده سيدي ياقوت عاش مع الشيخ، واتعلم على إيده علوم الدين، وخدمه سنين، وده خلاه قريب منه 📿
مع الوقت، الشيخ المرسي أبو العباس جوزه بنته السيدة بهيجة أو مهجة، حفيدة الشيخ أبو الحسن الشاذلي 👨👩👧
سيدي ياقوت كان معروف بالزهد والعبادة، وكان إمام في المعارف، وأخد علمه من الشيخ المرسي أبو العباس، كمان هو اللي سمّاه ياقوت العرش، لأن قلبه كان دايمًا متعلق بالآخرة، وقيل إنه كان بيسمع أذان حملة العرش (الملايكة اللي شايلين عرش الرحمن) ✨
سيدي ياقوت العرش اتوفى ليلة 18 جمادى الآخرة سنة 732 هـ، وكان عمره حوالي 80 سنة. ضريحه موجود جوه مسجده في بحري – حي المساجد في إسكندرية 🕌
مدخل المسجد بيطل على الشارع اللي شايل اسمه من الناحية الغربية، وبابه كبير وفيه زخارف محفورة. سقف المسجد متشال على ستة أعمدة مثمنة، بقواعد مزخرفة وتيجان عربية.
وفي الناحية الشمالية من صحن المسجد فيه تلات أبواب، الباب الأوسط فيهم بيؤدي للضريح، وهو مقصورة مربعة من الخشب، جواها قبر سيدي ياقوت العرش، ومغطيه ستر أخضر، وفوقه قبة كبيرة 🟢
وكل سنة بيبقى فيه احتفال بمولد سيدي ياقوت العرش يوم 25 رمضان، وبييجي ناس من أماكن مختلفة يشاركوا في الذكر والاحتفال 🤍
🔔 تابعونا علشان تتعرفوا أكتر على شخصيات من بره إسكندرية، بس جت وعاشت و سابت اثر فيها
.
Hits: 5