مين فينا فى إسكندريه ما عداش ادام مستشفى جمال عبد الناصر وشاف عظمة تصميمها وجمال جناينها ؟
.. تعرف مين اللى بني المستشفى دى وإيه حكايتها ❓❓
اللي بناها الخواجة كوتسيكا ((ملك_السبرتو ))
▪️والخواجه ثيوخارى كوتسيكا كان أغنى رجل أعمال فى الجالية اليونانية فى مصر .. كان يملك سنة 1910
خمسة مليون جنيه مصرى من الذهب الخالص
و كان كبير الجالية المصرية اليونانية فى مصر
ويعتبر صاحب أول مصنع كحوليات في مصر وبناه سنه 1893 وبني كمان مصنع النشا والجلوكوز .
الخواجه ده هو اللي بني المستشفى اليوناني
و السبب إنه كان فيه مرة من المرات إنفجرت غلايه فى عامل عنده فى المصنع حاولوا ينقلوه للمستشفى فى كاميون السبرتو لكنه مات قبل ما يوصل المستشفى.
حزن الخواجه كوتسيكا جدا وقرر إنه يكون من المؤسسين لهيئة الإسعاف المصرية ومش بس كده ده قرر يستورد لها
من فرنسا أول أوتوموبيل إسعاف فى مصر وإتبرع بيه
و من شدة تأثر الخواجه بالحادثة دي …قرر إنه يقوم بعمل خيري كبير جدا وقال لنفسه. :
“أنا هعمل أكبر مستشفى يونانى فى إسكندرية”
و فعلا قرر الخواجه كوتسيكا إنه يبني أعظم مستشفى فى بر مصر كلها .
وتيجى سنة1938 ويتم افتتاح المستشفى اليونانى فى الإسكندرية أو مستشفى كوتسيكا .. واللي كانت من أكبر مستشفيات مصر فى الوقت ده وكانت المستشفي ليها دور مهم أيام الحرب العالمية الثانية لما جنود الجيش اليوناني وصلوا مصر بسبب الغزو الألماني لليونان وفي الفترة دي كان بيتعالج فيها الجرحي اليونانيين و المصريين وكان عدد سراير المستشفى حوالي 250 سرير.
و الخواجة كوتسيكا له إنجازات كتير منها إنشاء عمارة كوتسيكا ودى عمارة عملاقة و بتعتبر من رموز إسكندرية وهي حاليا في المنشية بعد سراي الحقانية و مبنية علي الطراز اليوناني وعمل كمان أول مصنع للكحول (السبرتو) في منطقة قريبة من طرة بالقاهرة و لحد دلوقتي المنطقة دي إسمها كوتسيكا و محطة المترو القريبة منها إسمها أيضا محطة كوتسيكا
وتمر السنين وتيجى سنة 1961 ويتم ضم المصانع لشركة النشا والجلوكوز ويتم تغيير إسم المستشفى لمستشفي جمال عبد الناصر ..
هى دى حكايه مستشفى جمال عبد الناصر …..مين كان عارف حكايتها ؟؟☺️🤔
Hits: 924