ايام قليلة ونستقبل اجمل شهور السنه ….شهر رمضان المعظم .وبالمناسبة دى لما سألنا بعضنا اية اكتر حاجة متغيرتش وطول عمرنا بنسمعها فى رمضان ؟؟؟وياترى رمضان ارتبط بايه فى مصر ؟؟؟كانت الإجابة مدفع الافطار📢📢💣💣وتحديدا {{مدفع الافطااااااار اضررررب}} مع صوت أدان المغرب. طيب ايه حكاية مدفع الافطار؟؟؟ وياترى دى عادة مصرية ولا جتلنا من الدول العربيه؟؟؟ الحقيقة لما دورنا عن قصة مدفع الافطار قابلتنا اكتر من قصة لكن كلها أجمعت إن اول بلد فى العالم العربي ينطلق منها مدفع رمضان هى القاهرة وعن حكاية مدفع الافطار فيه اكتر من رواية .1️⃣ مثلا اول الحكايات حكاية بتقول أن وقت غروب أول يوم من رمضان سنة 865 هـ حب السلطان المملوكي خشقدم أنه يجرب مدفع جديد وصله وصادف أن وقت تجربه إطلاق المدفع كان وقت المغرب بالضبط فى رمضان فالناس افتكرت أن السلطان اتعمد يطلق المدفع عشان ينبيه الصائمين أن داه وقت الفطار ، وراح كتير من الأهالي لمقر الحكم عشان تشكر السلطان على البدعة الحديدة دى ، وبيقولك لما شاف السلطان أنهم مبسوطين قرر انه يطلق المدفع كل يوم وقت الفطار ووقت السحور والإمساك. دى كانت الحكاية الاولى . 2️⃣ وفى حكايه تانية بتقول أن ظهور مدفع رمضان جه عن طريق الصدفة، لان مكانش فى اى نية مبيتة لاستخدام مدفع افطار كل الحكاية أن كان فى بعض الجنود في عهد الخديوي إسماعيل بينضفوا واحد من المدافع، فطلعت منه قذيفة وكان صوتها عااالي في سماء القاهرة، وتصادف أن كان داه وقت أذان المغرب في يوم من أيام رمضان، فافتكر الناس أن الحكومة عملت تقليد جديد عشان تعلن عن ميعاد الفطار، ولما عرفت الحاجة فاطمة بنت الخديوي إسماعيل باللى حصل ، عجبتها الفكرة، وطلعت فرمانً باستخدام المدفع وقت الفطار والإمساك وفي الأعياد الرسمية.ومن مصر للعالم الإسلامي بدأت الفكرة تنتشر في أقطار الشام أولا، القدس ودمشق ومدن الشام وبعدين بغداد ، ولكل بلاد الخليج قبل ما يظهر عصر البترول وبعدين اليمن والسودان وكمان دول غرب أفريقيا زى تشاد والنيجر ومالي ودول شرق آسيا وبدأ مدفع الإفطار عمله في إندونسيا سنة 1944.تختلف الحكايات لكن يفضل أن مدفع الافطار بدايته كانت من مصر ام الدنيا وتحديدا من القاهرة كل سنة ومصرنا بخير .استنونا مع حكاية المسحراتي وحواديت رمضانيه
Hits: 71