📯مدفع الإفاطااااار …… أضرب
صوت كلما بنستناه… وله حكاية جميلة تعالوا نتعرف عليها📯
⚜️زمان في مصر… أيام الدولة المملوكية، كان فيه سلطان اسمه خوشقدم، حوالي سنة 1465م. في يوم من أيام رمضان، جاب المدفع الجديد بتاعه وجربه عند غروب الشمس. بالصدفة، طلقة المدفع طلعت بالضبط وقت أذان المغرب!
و صوتها سمع البلد كلها
الناس طلعت تقول: “أهو السلطان بيعلن عن وقت الإفطار!” و كانوا فرحانين جدا و شكروه والسلطان لما عرف باللي حصل، عجبه الموضوع وقال: يبقى نعملها عادة، ونضرب المدفع كل يوم عند المغرب📯. ومن هنا بدأت حكاية مدفع الإفطار اللي لسه مستمرة معانا لحد النهاردة…
📯في حكاية شعبية كمان، بيقولوا إن بنت الخديوي إسماعيل ، اللي كانوا بيسموها الحاجة فاطمة، هي اللي حبّت يستمر إطلاق المدفع علشان الناس تعرف موعد الإفطار و السحور و الأعياد، ف أصدرت فرمان باستخدام المدفع يومياً ومن ساعتها المدفع بقي جزء اصيل من الطقوس في رمضان.
📯بدأ المدفع من القاهرة وانتقل إلى بلاد الشام، و الحجاز، والعراق، وشمال إفريقيا، وبقي عادة رمضانية مشهورة في العالم الإسلامي.
📯مع مرور الوقت، المدفع اتثبت في أماكن عالية زي قلعة صلاح الدين، علشان صوت الطلقة يوصل لكل الناس في القاهرة. ومع توسع المدينة، بقي فيه كذا مكان يضربوا فيه علشان كل الناس تسمع.
في الاول كانوا يستخدموا ذخيرة حيه و مع الوقت بقي بارود خفيف 💣
📯وفي القرن العشرين، الإذاعة بقت تنقل صوت المدفع يوميًا، فحتى اللي مش سامع المدفع بالشارع، يسمعه على الراديو 📻و نبدأ في الإفطار
المدفع ساعات كان يضرب قبل الفجر للسحور، وأحيانًا في وقت الإمساك، علشان الناس تعرف مواعيدهم.
⏳ومع مرور السنين، بقى صوت المدفع زي الفانوس والكنافة والقطايف… جزء من روح رمضان بيسبب بهجة لكل اللي بيسمعه كبار و صغيرين.
و رغم تطور التكنولوجيا كلنا بنستني جملة📯مدفع الافطاااار ،،،، أضرب … صوماً مقبولاً و افطاراً شهياً⚜️
Hits: 14