“مولاي صل وسلم دائماً أبداً
على حبيبك خير الخلق كلهم”
مدّاح الرسول … مسجد الإمام البوصيري.. صاحب “البُردة” عندنا هنا في اسكندرية 💚 في قلب الأنفوشي 🕌
🕌🕌مسجد موجود في ميدان المساجد في بحري، مسجد الإمام البوصيري 🕌قدام مسجد المرسي أبو العباس.🏛️المسجد اتبني علي نفس الطراز المعماري، لكن حكايته مختلفة ومليانة روحانية وتاريخ.
🏛️المسجد ماكنش بالشكل اللي شايفينه دلوقتي، ده كان زمان مجرد زاوية صغيرة، لحد لما اتبنى المسجد الحالي سنة 1274هـ الموافق 1858م، وبقى واحد من أهم المعالم الدينية في المنطقة.
📜طيب مين هو الامام البوصيري؟ صاحب البُردة؟
الإمام شرف الدين البوصيري هو واحد من أشهر شعراء مدح الرسول صلى الله عليه وسلم، وارتبط اسمه بقصيدة “البُردة” اللي شهرتها فاقت شهرة صاحبها نفسه، وبقت من أهم القصائد اللي المداحين بينشدوها في الليالي الدينية والمولد النبوي.
📜القصيدة اسمها الأصلي “الكواكب الدرية في مدح خير البرية”، واتعرفت كمان باسم “الميمية” لأن قافيتها بتنتهي بحرف الميم. واتقال إنها اتسمت بالبُردة بعد رؤية شاف فيها النبي صلى الله عليه وسلم وهو بيغطيه ببردته ((بعبايته)) فشُفي من مرضه، علشان كده اتعرفت كمان باسم “البرأة” يعني برئ من مرضه
📜 البُردة
قصيدة طويلة تقع في 160 بيتاً وأشهر أبياتها يقول فيه:
“مولاي صل وسلم دائماً أبداً
على حبيبك خير الخلق كلهم”
ويتميز مسجد البوصيري بجدرانه التي تتزين بكتابات بالخط الكوفي، عليها أبيات من قصيدته الشهيرة التي يتغنى بها المداحون في الموالد والاحتفالات الدينية…
💚شرف الدين أبو عبد الله محمد بن سعيد البوصيري، اتولد سنة 608هـ / 1213م، ونُسب لمدينة بوصير بصعيد مصر. عاش فترة في القاهرة وتعلّم فيها العلوم الشرعية واللغوية، واشتغل في كتابة شواهد القبور وبعدها كاتب حسابات في بلبيس، ثم افتتح كُتّاب لتعليم الأطفال.
وفي النهاية استقر في الإسكندرية لحد وفاته سنة 694هـ / 1295م، وتتلمذ على يد الشيخ أبي العباس المرسي وتأثر بطريقته الصوفية، وذاع صيته بقصائد مدح الرسول صلى الله عليه وسلم.
🕌 وصف المسجد
المسجد بيتكوّن من مربعين منفصلين:
▪️ المربع الأول فيه صحن المسجد وفي وسطه نافورة، وحواليه أروقة من كل الجهات.
▪️ المربع التاني فيه إيوان القبلة، ومنه بيوصل لضريح الإمام البوصيري اللي تعلوه قبة من الصاج.
مئذنة المسجد جت على شكل مسلة، والطراز العام للمبنى تركي من القرن التاسع عشر، وشهد المسجد مؤخرًا أعمال تطوير وتجديد شملت أجزاؤه المختلفة والواجهة الخارجية.
رحم الله شاعر و مداح الرسول💚
Hits: 3