كلامنا معاكم النهارده عن موضوع خطير اسمه (كيس البلاستيك) الكيس اللي بنشيل فيه حاجتنا من السوق أو من السوبر ماركت او بنحط فيه العيش . الكيس ده لما بنرميه بيتحلل في مدة من 10 ل 20 سنة، وكمان زجاجات المياه البلاستيك والزيت والعصير الحاجات دي عشان تتحلل ومتتخضش من الرقم بتاخد 450 سنة (ايوة زي ما قريت) 450 سنة عشان تتحلل.. وقيس علي كدة اي حاجة بلاستيك حواليك بتستخدمها ……الأطباق البلاستيك بتتحلل بعد 50 سنة البالونات بعد 6 شهور فرش الأسنان بعد 200 سنة. ناس كتير مش عارفه ان فيه 700 نوع من الكائنات البحرية بيهددها البلاستيك وبتموت حيوانات بحرية كتير بسبب انها بتتخنق بالاكياس. المخلفات البلاستيكية اللي بتترمي في البحر بتوصل سنويا ل 8 مليون طن تقريبا ودي غير قابلة للتحلل وبتتفكك لجزيئات صغيرة ولما بتاكلها الأسماك بتنتقل لدورة غذاء الإنسان يعني بنضر البيئة البحرية وبنضر نفسنا. هتقولي البلاستيك دا بنستخدمه بشكل اساسي ويومي هقولك البدائل للبلاستيك كتير يعني بدل ما تستخدم اكياس بلاستيك تشيل فيها حاجتك في أكياس قماش او ورق صديقة للبيئة، بدل زجاجات المياه البلاستيك استخدم الإزاز وصندوق الطعام او اللانش بوكس تقدر تستخدم مكانه ستانلس ستيل وهيكونوا صحيين اكتر ليك ولولادك واكيد مش هننسي ولادنا حبايبنا والعابهم اللي معظمها من البلاستيك تقدروا تختاروا العاب مصنوعة من السيليكون، في النهاية كلنا نفسنا نعيش في بيئة صالحة غير مهددة بأي خطر ابدأ بنفسك واحنا معاك. العيش الساخن اللي لسه طالع م الفرن ويتحط جوه كيس بلاستيك بيخلي الكيس كأنه بيعرق او بيسيح….. الكيس مكوناته مصنوعة من مشتقات الوقود حضرتك😱 اللي من ضمنها الرصاص وده بيسيح ويتجمع فوق الرغيف اللي بناكله ف البيت……علشان كده بنسمع عن امراض واورام كتير انتشرت ٱخر كام سنة. عايزين نرجع لشبكة العيش المصنعة من الياف غير ضارة..او نصنع شنط قماش نخصصها للموضوع ده ..او شنط ورق. حياتنا وحياة احبابنا غالية ولازم نحافظ عليها.
Hits: 35