في المقال ده احنا هنقولك ليه شواطئ الإسكندرية 🎇🎇🎇🎇
صباح الخير لكل متابعينا 🌞🌞🌞
معظم اولادنا خلصوا امتحانات وربنا مع باقى الاولاد، والنجاح والتوفيق لكل الاولاد 🤲🤲
اكيد بعد ضغطة الامتحانات محتاجين نغير جو وعشان كدة البوست ده لكل واحد مضغوط ومحتاج يفصل ويغير جو ويفسح اولاده من غير ما ينضغط اكتر 🎉
بنفكركم ان نسب اشغال الشواطئ متعدتش 25%وان الجو هايل وده انسب جو ووقت نروح فيه البحر🏖️🏖️ قبل زحمة الصيف. نسيبكم مع البوست اللى هيوضح ،ويرد علي كل استفساراتنا .
صباح سعيد من شواطئ الإسكندرية 🏖️🏖️🏖️
♦️ ليه شواطئ اسكندرية ؟؟؟
▪️ليه شواطئ اسكندرية ده سؤااااال !!!!
اقولك ليه شواطئ اسكندرية .
مش هقولك عشان هى مخزون الذكريات وعشان اللى بيجيلها مرة بيقع فى حبها وبيتمني يعيش فيها ولا اى حاجة.
هكلمك بلغة الاقتصاد اللى تفرق معانا كلنا الايام دى .
🏖️عشان شواطئ اسكندرية هى أرخص وأنضف شواطئ علي مستوى كل المحافظات الساحلية.
ازاى ؟؟؟هقولك برضو
أولا بتنفرد شواطئ إسكندرية أن فيها اتنين شاطئ مجانى وأوعى تقولي مازمان كانت الشواطئ مجانيه لأن هنا لينا وقفة كبيرة
عمر الشواطئ ماكانت مجانية لو تفتكر كان محصل البلدية بيمر عليك يسيبلك تذكرة بنص فرنك فى بوصة الشمسية .
تاني حاجة ودى الأهم إنك كنت بتشيل شمسيتك وكراسيك أو ملايتك اللى هتفرشها فى الشاطئ من بيتكم وتتكلف مواصلات وكانوا ولادك طيبين واحد فيهم بيشيل الشمسية الشارع الطويل اللى كنا بنمشيه فى منتهى السعادة لحد البحر ودا مستحيل يحصل دلوقتي .
لكن لما تدخل شاطئ مجانى تلاقى شمسية بالمجان وكراسي بالمجان يبقي هنا لازم نقف وقفة كبيرة ونقول ونهلل ،ونفرح، أنها أول مرة تحصل فى شواطئ إسكندرية وهتفضل شواطئ إسكندرية فاكرة إن اللواء محمد الشريف هو أول محافظ يطبق فكرة المجانية علي الشواطئ .
ننتقل للشواطئ الأعلي وهى شواطئ بخمسة جنيه الفرد وتاخد مقابل الخمسة جنية شمسية وكرسي وتستعمل دورة المياة وغرفة خلع الملابس طب بجد فى حاجة بخمسة جنيه دلوقتي ده أقل باكو بسكوت بأكتر من الخمسة جنيه مش كدة ولا ايه ؟؟؟
ننقل للأعلي شوية شواطئ بعشرة جنيه للفرد والأعلي خمسة عشر جنية وأخير ست شواطئ أعلي فئة وهى الشواطئ السياحية بخمسة وعشرين جنيه للفرد و كل تذاكر الدخول بتسمحلك تاخد كرسي وشمسية،
و السعر ده ارخص من سعر دخول اي شاطئ خاص👌🏻
طيب مش أحسن ما تشيل الشمسية والكراسي من بيتكم لحد البحر دى حتى مش هتبقي فسحة هتبقي شقي 😂😂😂
طيب تفتكر عشان الشواطئ رخيصة الخدمة فيها مش تمام ؟؟
اتحداك وأقولك جرب الرقابة عندنا صااارممة لاتهاون مع الإستغلال وبيني وبينك أرقام الشكاوى عندنا 8أرقام للشكاوى واللى جربنا عارف ومصدق كلامى، كلمنا وقول ع المشكلة اللى بتحصل معاك بشرط يكون معاك حق وتكون ملتزم هتلاقينا فى ضهرك ومعاك ضد كل من فكر يستغلك من أول أصغر عامل لحد مستأجر الشاطئ لو عارف وساكت .
إحنا بنحاول نكون سبب فى إدخال السعادة بنحاول نكون القناه اللى بتسمع وتستجيب طالما صلاحيتنا مساعدانا إحنا مواطنين زى حضراتكم بالظبط وحاسين بيكم وشغلنا طالع من قلبنا و بنوعدكم ببذل كل مجهود يليق بحضراتكم و بشواطئ عروس البحر الابيض المتوسط
أرقام الشكاوى بالقطاع الشرقي
٠١٢٧٠٧٤٦٤٩٠ – ٠١٢٨٩٢٥٢٦٦٨
٠١١١٩٥٥٥٩٤٦ – ٠١٥٠١٢٩٧٨٨٨
أرقام الشكاوي بالقطاع الغربي
٠١٢٢٥٢٦٧٢٧٦ – ٠١٢٢٠٠٣٠١٠٣
٠١٢٠٣٩٨٦٣٢٤ – ٠١٢٢٢٢٦٥٠٣٤
كل سنة وكلنا طيبين
Hits: 11