معلومة عن قصر عزيزة فهمي 👌👌
على الكورنيش بمنطقة مظلوم بين حي جليم وزيزينيا موجود القصر الفخم ده..
مع بدايات القرن ال١٩ وإنشاء كورنيش إسكندرية..إهتم كتير من رجال الدولة والأثرياء من بناء السرايات والقصور قدام الكورنيش..عزيزة فهمي هي بنت علي باشا فهمي وإللي بيُذكر أنه كان من كبير مهندسي القصر الملكي.. تم تصميم القصر على يد المعماري الإيطالي أنطونيو جراناتو سنة ١٩٢٣ م ليكون مصيف لعزيزة هانم فهمي زوجة الروزنامجي باشا وأسرتها. القصر بيُحاكي تصميم الPalladian وهو نوع من التصميم النيو كلاسيكي بلمحة رومانية وإللي إنتشر في أوروبا. مبنى القصر مساحته حوالي ٦١١م٢ على مساحة أرض تصل ل ١٦٠٠٠م٢. القصر بيتكون من بدروم وطابقين. البدروم مُقسّم ل: مطبخ، غرف الخدم والملحقات. الطابق الأول والثاني بيضموا الغرف الرئيسية و قاعات الإستقبال وغرف المعيشة و حمامات ومصاعد. على الرغم من إن القصر مُسجل في سجل حفظ التراث لكن من أكتر من ٥٠ سنة نشأ نزاع على القصر والأرض بين الورثة وشركة عقارات سياحية والأسباب كتيرة ومعقدة وغير مفهومة.. لكن المفهوم إن القصر دا زي كنوز كتير محتاجة إهتمام وصحوة من الجهات المعنية علشان نقدر كأهل إسكندرية وضيوفها نستمتع بالتراث المميز بتاعنا ونزور الأماكن الرائعة دي.
Hits: 297