فريسكا ….ايوه فريسكا …📢📢 وانت قاعد علي شواطئ اسكندرية لازم تسمع الصوت دا : فريسكا…. ايوه فريسكا صوت يخطف قلبك وعقلك ويرجعلك ذكرياتك سنين كتير ورا . والفريسكا دى حلوى اسكندراني ارتبطت بشواطئ اسكندرية واتشهرت بيها . وبتغازل الكبار قبل الصغيرين ،من جوا الصندوق الإزاز اللى شايله علي كتفه الواد الأسمر اللي شمس الصيف صبغت لونه عشان ترسم بيه اجمل لوحة تشوفها علي البحر ..والفريسكا كلمه ايطاليه معناها ((الطازج أو الشهى)) وعرفها الاسكندرانية لما جت الجاليات الإيطالية لإسكندرية واتشهرت الفريسكا بعدها وارتبطت بالشواطئ ومهما اتباعت فى محافظات وفنادق.. عمر طعمها ما هيكون زى ما بتاكلها ع شواطئ إسكندرية .معلومة ع الماشي كدة… زادت شهرة الفريسكا الإسكندراني بعد المسلسل التليفزيونى الشهير “‘الفريسكا “”بطولة الفنانة الكبيرة اثار الحكيم واللى كان بيحكي عن حكاية بنت بتبيع فريسكا. وكتب شاعرنا الكبير احمد فؤاد نجم تتر المسلسل وقال (كان فيه يا بلدنا يا نساية، حتة بسكوته فريسكاية، ع الشط تبعتر ضحكتها تفرش حدوتة وغنواية) .هنسيبكم مع فيديو صغير لشاطئ ( فريسكا ) أو ميامي المميز اللي بيطل علي جزيرة ميامي وبيشتهر باتساع مساحته الرملية وقربه من مركز المصطافين المفضل وهو شارع خالد ابن الوليد .سعر دخول الفرد خمسة عشر جنيه شامل الحصول علي كرسي وشمسية واستعمال دورة المياه.ودا لينك الشاطئ علي موقع الإدارة المركزية للسياحة والمصايف.https://catr.gov.eg/beach/%d8%b4%d8%a7%d8%b7%d8%a6-%d9%85%d9%8a%d8%a7%d9%85%d9%8a-%d8%a7%d9%84%d9%85%d9%85%d9%8a%d8%b2/منتظرينكم علي شواطئ الإسكندرية.