احنا فين؟
احنا في شارع المشير أحمد إسماعيل
في اسكندرية منطقة سيدي جابر.
💫المشير احمد إسماعيل رجل الحرب…الذي قادها وهو مريض بالسرطان!!!
🏅💪🏻طيب تعرف مين هو المشير أحمد إسماعيل؟
تعالوا نتعرف عليه 👇
🏅المشير أحمد إسماعيل علي… القائد العام للقوات المسلحة ووزير الحربية وقت حرب أكتوبر 1973 🇪🇬
🏅اتولد سنة 1917، ودخل الكلية الحربية شاب عنده حلم يبقى ضابط يخدم بلده. شارك في حرب فلسطين 1948، وعدّى على مناصب كتير في الجيش لحد ما بقى واحد من أهم العقول العسكرية في مصر.
وبعد نكسة 1967، اتكلّف يعيد بناء الجيش وينشئ خط دفاع جديد غرب قناة السويس،،، قبل الحرب بـ شهور قليلة، الرئيس السادات عيّنه “وزير للحربية” والقائد العام للقوات المسلحة، ودي كانت ثقة كبيرة في قدراته، لأنه اتكتب له الدور الأهم…
كان المخطط الرئيسي للهجوم اللي بدأ حرب أكتوبر 1973، واللي سُمّي “عملية بدر” — وهنا الجيش المصري عبّر قناة السويس وبدأ النصر العظيم 🇪🇬✨.
لكن اللي ناس كتير ما تعرفوش،
إنه وقت الإعداد للحرب كان بيعاني من مرض السرطان. ورغم كده، مطلبش إعفاء، ومتراجعش….كان حاضر في كل تفاصيل التخطيط، وكل اجتماع مصيري.
💫 بعد الحرب، في نوفمبر 1973 اتمنح أعلى رتبة عسكرية في مصر “مشير” — وهي رتبة شرفية كبيرة للي ليهم دور تاريخي في الجيش 🇪🇬.
و لكن بعد شهور قليلة من النصر،
توفي في ديسمبر 1974 بعد صراع مع المرض
بس اسمه اتكتب في التاريخ،
واتحط على شوارع و مدارس و كليات مصر، ومنهم شارع عندنا في سيدي جابر 👏:
• شارع المشير أحمد إسماعيل – مدينة نصر، القاهرة
• شارع المشير أحمد إسماعيل – سيدي جابر، الإسكندرية
• كلية المشير أحمد إسماعيل الحربية
وهي كلية عسكرية اتسمّت باسمه تقديرًا لدوره كقائد عام للقوات المسلحة وقت الحرب.
• في كمان ميادين ومدارس عسكرية ووحدات داخل القوات المسلحة بتحمل اسمه تكريمًا ليه.
🇪🇬المشير أحمد إسماعيل كان من القادة القلائل اللي خدوا رتبة “مشير” بعد النصر🥉🏅🎖️و كمان حصل على العديد من الجوائز والنياشين تقديرًا لخدمته، منها أوسمة عسكرية مصرية وعربية وأجنبية، تقديرًا لدوره في خدمة وطنه.
💪🏻رجل حارب و انتصر…وهو مريض… لكنه مستسلمش. 🇪🇬✨ و هما دول الأبطال المذكورين في كتاب الله عز و جل
﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلًاَ﴾
– سورة الأحزاب، آية 23
Hits: 2