معظمنا راح سوق راتب فى المنشية
طيب ليه سموه سوق راتب ومين هو راتب ؟؟
هناخدك فى رحلة قصيرة نتعرف فيها علي شخصية راتب باشا ..
راتب باشا اتولد آخر سنة فى الحملة الفرنسية ولما محمد على حكم مصر اتعلم فى المدرسة الحربية إللى عملها محمد على باشا و كمان درس القانون
وقعد يرتقى فى المناصب لحد ما بقى محافظ للاسكندرية وكان ترتيبه المحافظ رقم ١٥ من سنة ١٨٥٤ إلى سنة ١٨٥٥ وكمان كان تالت رئيس لمجلس شورى النواب فى عصر الخديوى أسماعيل مرتين و كمان كان سردار الجيش المصرى سنة ١٨٧٧ يعنى وزير الدفاع
انشأ أبو بكر راتب باشا وقف ٩٠ فدان و سوق كبير إللي هو سوق راتب إللي بنتكلم عنه وعمل بيت كبير فى المنشية فى شارع رأس التين بجوار جامع عبد الرحمن هرمز إللي بقي مدرسة راتب باشا دلوقتي
وكان عنده ولد و بنت
الولد سماه على اسم الخديوى اسماعيل
أسماعيل راتب و بنت أسمها أمينة هانم
اسماعيل كمان خلف ولد اسمه محمد
والبنت خلفت بنت أسمها فاطمة دولت
محمد أسماعيل ابو بكر راتب خلف ولاد كتير منهم ولد سماه على اسم جدو أبوبكر
فبقى أبوبكر محمد أسماعيل أبوبكر راتب
ابو بكر الحفيد اتجوز هانم اسمها سلطانه عمر
جابو ولد سموه جميل
وجميل ده الممثل إللى اسمه جميل راتب اسمه بالكامل
جميل أبوبكر محمد أسماعيل ابو بكر راتب اتولد سنة ١٩٢٨ بعد جده الكبير ما اتوفى ب ٥٠ سنة ودى حكاية مدرسة راتب وسوق راتب .
عن صفحة (حواديت إسكندرية)