اسكندرية طول عمرها ملجأ لكل الجنسيات…….
اسكندرية دائما فاتحه أحضانها للعالم كله❤️
كل الخواجات والشوام جم اسكندرية عشان يشتغلوا بالتجارة ونجحوا نجاح كبير جدا النهاردة هنتكلم عن باشا كبير جه من سوريا فى الشام وحب اسكندرية جدا ورجع عشان يجيب اخوه ويبدأوا تجارتهم فى اسكندرية الباشا بتاعنا النهاردة … اسمه اسعد باشا باسيلي تاجر أخشاب اد الدنيا .
▪️ أتولد اسعد باشا فى الشام فى سوريا لعيلة أصلها جريجى الكلام ده سنة 1880 كان شاطر دخل المدرسة الأرثوذكسية فى الشام أبوه كان تاجر خشب و اخواته كمان .
بس هو كان نبغة فى كل حاجة يتكلم عربى و فرنساوى و انجليزى كمان واتعلم شعر وأدب و لما كبر كان بيكتب مقالات فى الجرايد
لحد ما ف يوم كتب مقاله اسمها العلم والدين هاجت عليه سوريا كلها فقرر انه يجى مصر بلد العلم و الحرية و الثقافة
واختار يجى اسكندرية
ولما جه اسكندرية وقعد شوية شاف تجارة الخشب وعرف أن تجارة الخشب من احسن الاستثمارات فى الوقت داه
رجع الشام وقعد يتحايل على أخوه الكبير أنطونيوس واقنعه أنه يجى اسكندرية ويتاجروا فى الخشب
أخوه وافق و فى عشر سنين بقوا أكبر تجار خشب فى اسكندرية كلها وبقى عندهم مخازن كتير فى الورديان والقبارى بس هما كانوا ساكنين فى شارع فؤاد
و ف يوم شاف العمال و المستخدمين عنده بيمشوا مشوار بعيد عشان يروحوا يصلوا فى الجامع
راح قرر يبنى جامع كبير يصلى فيه العمال
وفعلا جاب احسن مهندسين و احسن صنايعية عشان يبنوا الجامع
لكن للأسف مات أسعد باشا يعقوب باسيلى قبل افتتاح الجامع سنة 54
واتأممت الشركة بتاعته و الجامع اخدته الأوقاف وغيرت اسمه بس كل أهل الورديان لحد دلوقتى يقولوا عليه جامع باسيلى.
أما بقي سرايا اسعد باشا باسيلي اتباعت للقنصلية الأمريكية بمبلغ 35000 جنيه سنة 1960 و قامت الهيئة العامة للاثار بشرائها من القنصلية الأمريكية ب 12 مليون جنيه سنة 1996وبقت متحف الإسكندرية القومى.
اقولك علي مفاجئة كمان
اسعد باشا باسيلي خال الفنان الكبير عمر الشريف.
Hits: 333