كل الناس في مصر عارفه إن الإسكندرانية بيحبوها أكتر في فصل الخريف والشتا …
بس عمرك سألت نفسك ليه؟ 🤔
تفتكر عشان الشواطئ بتكون أهدى مثلًا؟ ولا الجو بيبقى لا هو حر ولا برد؟
تعالى أقولك السر .
إسكندرية في الخريف ليها طبيعة خاصة جدًا…
الجو معتدل، والنسمة بتطبطب، والبحر هادي كأنه بيرتاح بعد زحمة الصيف .
اسكندرية كلها بترجع لهدوءها القديم، وسكانها الحقيقيين بيرجعوا يستمتعوا بيها على راحتهم.
تمشي على الكورنيش تلاقي الموج بيلعب على الهادي، والشمس لونها دهبي خفيف كأنها بتغيب على مهل، والريحة؟ ؟؟؟؟
ريحة بحر ممزوجة بنسمة خريف… مفيش أحلى من كده .
جرب يوم كده تقضيه في الماريا وياسلام لو يوم جمعه هتبقي اصبت الهدف بجدارة ، تتمشى على الشط الصبح بدري، والدنيا لسه فيها سكون البحر ونسمة الخريف، تحس إنك سافرت بره مصر فعلاً.
☕ بعد كده خدلك كوباية قهوة أو كوبايه شاى بالنعانع سخنه في كافيه بسيط على البحر، واسمع أغانى فيروز الصبح أو عبدالوهاب بعد الضهر، هتحس إن الزمن رجع بيك لأيام الهدوء والرِوَقان 🎶
🏖️ الخريف في الإسكندرية هو الوقت المثالي لكل حاجة:
تصوير، تمشية، تأمل، أو حتى قعدة هادية مع أصحابك على الشاطئ.
لا زحمة ولا حر، بس جمال على طول الخط 💙
الإسكندرية في الخريف مش بتستنى الصيف عشان تبهر الناس…
هي دايمًا جميلة، بس في الخريف بتبان على طبيعتها الحقيقية: بسيطة، رايقة، ومليانة حياة 🌤️
Hits: 93