جرانيتا مهدي ..🍦
🍭بياع آيس كريم جلالة الملك، والرؤساء، والفنانين في اسكندرية.
🚶عم مهدى صاحب اختراع الجرانيتا وأول واحد عمل جيلاتي الليمون 🍋
لكن ايه هى الجرانيتا ؟؟وايه حكايه عم مهدى؟؟
ده اللي هنعرفه من السطور اللي جايه👇.
🩸بدأ عم مهدى شغله وهو عنده ١٢ سنه مع خواجه فى بحرى بيبيع الجيلاتي واتعلم منه وفضل يشتغل عنده، لحد ما بقي عمره حوالي خمسه وعشرين سنه.
وقتها قرر أنه يشتغل لحسابه وحب يأخد مكان منفصل لنفسه .
فضل عم مهدى ماشي علي البحر لحد ما وصل لجليم علي البحر وعمل كشك خشب مكانه معرض تاكى للمراتب دلوقتي .
واشترى معدات الجيلاتي وكانت عباره عن برميل خشب وآذان نحاس ،
وبدأ يعمل الجيلاتي لوحده، وكان حابب يعمل حاجة مختلفة تميزه .
عمل جيلاتي الليمون ولأن الليمون مينفعش يتحط عليه حليب كان جيلاتي الليمون من غير حليب اهم مكون فى الجيلاتى وقتها .
وسماه جيلاتي ليمون وبعد شويه سماه دندورما الليمون .
لحد ما ( جليمونوبولو ) عضو المجلس البلدي لمحافظة إسكندرية ، واللي إتسمت على إسمه المحطة والمنطقة كلها ( جليم ) ، اكل دندورما الليمون من عند عم مهدى وقال له إنها في إيطاليا إسمها ” جرانيتا ” ، وأنه كل ما يزور والدته فى إيطاليا لازم ياكل جرانيتا الليمون ومن يومها بقى إسم المحل ( جرانيتا مهدي ) .
🤔 لكن ازاى الجرانيتا عرفت طريقها للملوك والباشوات ؟؟؟
أقولك .
الملك فاروق كان وقتها لسه ولي عهد المملكة المصرية ، وكان في مبني جمب عم مهدى مكون من اربع أدوار 🏣 (عمارة الفيومي حاليا) ودا كان أعلي مبني وقتها وأخر دور كان كافتيريا ،
كان فاروق وأصحابه دايما يروحوا ليها ، وشاف فاروق الزحمة اللي على المحل، فنزل إشترى منه جرانيتا، وساب له ( جنيه ) وكان مبلغ ضخم جدًا وقتها على سعر الجرانيتا ، وركب العربية البيضاء بتاعته وأتحرك .
عم مهدي معرفش إن ده الامير فاروق ولي العهد غير لما شاف الناس واقفين بيحيوه وبيسقفوا له جامد…… هنا عرف أن ده الامير فاروق ، ومن يومها الجرانيتا عرفت طريق بيوت الباشوات والأمراء والأعيان وبقت أكلة الاكابر ، وبتروح لهم لحد قصورهم .
مهدى كمان عمل جرانيتا فراوله 🍓ومانجه 🥭كل موسم علي حسب الفاكهه بتاعته .
▪️عارف كمان مين جه بعد الثورة أكل من نفس المحل ؟
الرئيس جمال عبد الناصر ، والسادات .
وفنانين كتير جدًا ، ومشاهير وأعلام .
الغريب إن المحل مشهور بين أهل القاهرة وبييجوا له مخصوص في المصيف ، أكتر من أهل إسكندرية نفسهم .
المحل لسه موجود ، بقاله 86 سنة بيبيع نفس المنتج ، من سنة 1937 م .
وبيتوارث بين نفس العيلة ، مدخلش حد غريب .
لما تروح جرانيتا مهدى هتلاقي الأستاذ (محمود علي مهدي ) الجيل الثالث من العيلة ، واقف بنفسه في المحل ،يعمل لك أحلى جرانيتا ليمون.
ويحكي لك ويوريك حائط الذكريات ، والأخبار اللي أتنشرت في الجرايد عن محل أبوه وجده …
طيب المحل فين ؟
المحل فى جليم على البحر ، جنب النفق ، اول شارع مصطفي فهمي…
روحوا زوروا عم محمود ، ومحل جرانيتا مهدي ..
🙏البوست اهداء من صديق الإدارة Mina Zaki👏👏
Hits: 276