🔻أنتوا غيرتوا أسماء الشواطى❓❓❓
آه بعض أسماء الشواطئ مش كلها تم تغييرها.
▪️إزاى تعملوا كدة إزاى تشيلوا إسم أبو هيف من ع الشواطئ؟
◽لا حضرتك فاهم غلط إنت تصدق اننا ممكن نعمل كدة نشيل إسم فخر إسكندرية السباح العالمي عبد اللطيف أبو هيف (تمساح النيل)❓❓ كل الحكاية إن إسم السباح كان علي تلات شواطئ أبو هيف ١ و٢ و٣ وداه كان بيعمل مشكلة كبيرة وخاصة عند توقيع الغرامات وتحصيلها.. ولخبطة اكبر للجمهور خاصة لما توصف لحد وتقوله عند شاطئ أبو هيف يرد يقولك انهى واحد فيهم .
قولنا نخلي شاطئ يبقي شايل اسم أبو هيف تخليدا لبطلنا العظيم عبد اللطيف ابوهيف.
والشاطئ التانى ودى المفاجأة الكبيرة ✳️✳️
سميناه بإسم إسحاق حلمي
عارف مين إسحاق حلمي❓❓
💓البطل إسحاق حلمي هو عميد السباحين المصريين أول سباح مصرى يعبر المانش والإنجليز سموه فرعون النيل وهو المثل الاعلي وإللي ساعد السباح عبد اللطيف أبو هيف فى مشواره الرياضى…اكيد يستاهل اننا نخلد اسمه برضه..كده ولا إيه ؟؟
والشاطئ التالت بقي إسمه (إيناس حقي) .
لازم المرأة يكون لها دور وتواجد وخاصة فى حالة البطلة اللى معانا ❗❗
❤️ إيناس حقى (عروس النيل) وأول سباحة مصرية تفوز بلقب بطلة العالم الأولى فى سباحة المسافات الطويلة للفتيات فى فرنسا سنة 1955 وبالمناسبة هى والدة البطلة عبلة خيرى أول مصرية تعبر المانش سنة 1974وصاحبة الرقم القياسي كاصغر سباحة تعبر المانش فى عمر ١٣ سنة ولحد النهاردة الرقم داه محدش قدر يحطمه وايناس حقى أيضا زوجة عادل خيري إبن المسرحى العظيم بديع خيرى .
اكيد تستاهل برضه نخلد اسمها.
🔺احنا اسكندرانية وبنحب اسكندرية وبنحب ابطالها زيكم بالظبط.
اوعوا حد يقولكم غير كده.
اوعوا حد يقولكم اننا بنشيل اسماء الابطال الاسكندرانية اللي رفعوا علم مصر وسط ابطال العالم.
ولو اسحاق حلمي وايناس حقي مالاقوش زمان الفرصة ان يتخلد اسمائهم علي الشواطئ اللي عاموا واتدربوا فيها وبقوا ابطال عالم..يبقي العدل بيقول لازم نديهم حقهم في التكريم.
لازم كلنا نفهم ليه اتغيرت أسماء الشواطئ …كمان عاوزين الناس كلها تتعرف علي باقي رموزنا إللي بنفتخر أوى بيهم.
⭕كل يوم هقولك حكاية إسم شاطئ واتغير ليه.
مع تحيات فريق اعلام الادارة المركزية للسياحة والمصايف.
Hits: 128