لأننا دايما بنفتخر ونقدر سكندريتنا 🌊
النهاردة هنتكلم عن شخصية 🧑🏫 يمكن يكون اصله مش مصري لكن هو اتولد في إسكندرية وحبها زي ما كتير حبوها 🌊
اللي هنتكلم عنه النهاردة 🗣️ هو
الشاعر والأديب {{محمود بيرم التونسي}}
📝 واحد من أهم شعراء العامية في القرن العشرين واللي اتوصف بإنه شاعر العامية الأول وقالوا عنه إنه فنان الشعب 👨👩👧👦
🔹اتولد في اسكندرية يوم ١٢ مارس سنة ١٨٩٣ في حي الانفوشي من عيلة تونسية كانت مقيمة في إسكندرية 🌊
🔹والده كان صاحب مصنع حرير ولما وصل سن ٤ سنين وداه والده لكُتاب الشيخ جاد الله عشان يحفظ القرآن ويتعلم القراية والحساب 🔢
🔹بيرم مكنش بيحب الحساب لكن والده كان مصمم يعلمه ووداه المعهد الازهري في مسجد المرسي ابو العباس وانتظم ساعتها لكن لما والده اتوفى ساب الدراسة وهو عنده ١٢ سنة عشان يدور على شغل 👷
🔹وساعتها مر بظروف صعبه لأنه ملقاش شغل وبعدها ب ٥ سنين والدته اتوفت ومكنش عنده إلا بيت ميراثه باعه واشتري بيت تاني تمنه اقل ⬇️
🔹اتجوز وهو عنده ١٧ سنة وزوجته اتوفت بعد ٦ سنين جواز وكان معاه طفلين محمد ونعيمة فأضطر يتجوز تاني بعد ١٧ يوم عشان الطفلين محتاجين حد يرعاهم 🙏
🔹ولأنه كان بيحب الحكايات الشعبية من صغره زي حكاية ابو زيد الهلالي و الف ليلة وليلة وعنتر ابن شداد كان بيحفظ ابيات الشعر اللي موجودة في الحكايات دي وبدأت ساعتها هوايته تظهر وهو بيقرا إشعار ابن الرومي اللي اتعلم منها الهجاء والنقد اللازع 📝
🔹وقرا لأبي حامد الغزالي والمقريزي وعبد الله النديم وكانت بداية موهبته الحقيقية في الزجلية اللي كتبها عن المجلس البلدي اللي قال فيها
يا بائع الفجل بالملّيم واحدةً كم للعيال وكم للمجلس البلدي..
🔹وعملت ضجة كبيرة في اسكندرية بعد ما نشرتها صحيفة الاهالي وقرر بيرم ساعتها يعيد طباعتها وتوزيعها بشكل منفصل ووزع منها ١٠٠ ألف نسخة 📚
🔹كانت دي البداية الحقيقة لظهور موهبته في كتابة الزجل والشعر العامي وكانت ازجاله مليانة دعابة ونقد اجتماعي وبيقولها كأنها حكايات وده اللي خلي النقاد يسموه فنان الشعب 👨👩👧👦
🔹وفي سنة ١٩٢٠ بيرم التونسي قابل سيد درويش واتفقوا على كتابة اوبريت يقوي عزم المصريين في مواجهة الاحتلال الإنجليزي واتكتبت شهرزاد اللي مقدمتها كلنا حافظينها
أنا المصري كريم العنصرين بنيت المجد بين الأهرمين..
🔹الملك فؤاد غضب وانزعج من قصيدة البامية الملوكي والقرع السلطاني و أمر بنفيه بره مصر وده كان سنة ١٩٢٠ وفضل في المنفى ١٨ سنة كان فيها بين تونس وفرنسا وكان بيعاني من الغربة وفقدان الأهل والأصحاب وزيادة عليهم ألم الجوع ورجع اخيرا لمصر بعد وفاة الملك فؤاد في ٨ أبريل ١٩٣٨..
🔹وفي سنة ١٩٤٠ بيرم التونسي قابل كوكب الشرق أم كلثوم وكتبلها اكتر من ٢٠ أغنية اشهرهم انا في انتظارك والحب كله والاولى في الغرام وأهل الهوى وشمس الأصيل وحبيبي يسعد أوقاته وهو صحيح الهوى الغلاب والقلب يعشق كل جميل ومن كلمات بيوم التونسي غني فريد الأطرش أوبريت انتصار الشباب اللي اعتبره النقاد انه غيير مفهوم الأوبريت في الموسيقى العربية المعاصرة وغنت ليلى مراد من كلماته من بعيد يا حبيبي أسلم و يابهية وخبريني وغنت شادية طاوعني أنا وحدي واسمهان غنت من كلماته محلاها عيشت الفلاحة ولحنها محمد عبد الوهاب…
🔹وسنة ١٩٥٤ حصل بيرم التونسي على الجنسية المصرية وكان مرحب جدا بثورة ١٩٥٢ وعمل اغاني كتير و زجل فيها
🔹وفي سنة ١٩٥٥ كتب بيرم التونسي اغنية المسحراتي اللي محمد فوزي كان أول واحد عملها في الإذاعة لشهر رمضان.
🔹بيرم التونسي ساب ديوان شعر من ٣ مجلدات مجمع فيه آلاف قصايد الشعر والقصص والزجل والموشحات اللي كتبها
🔹وفي آخر أيام حياته اتصاب بيرم التونسي بمرض الربو واتوفي في ٥ يناير ١٩٦١.
🔸ودي كانت حياة فنان الشعب بيرم التونسي تابعونا دايما عشان تعرفوا اكتر عن مشاهير ومواليد اسكندرية اللي شرفوها 🔸
Hits: 2