اهلا بكل متابعينا ،احيانا بتقابلنا تعليقات من حضراتكم زي دي: ” البحر كله قمامه ” ” المعامله سيئه ” ” الشاطئ كله بلطجه ” ” الحمامات كلها مش نضيفه ” لما بنيجي نستفسر عن اسم الشاطئ او توقيت الزياره مش بنلاقي إجابه واضحه. الكومنتات الغير محددة دي للاسف مش بتفيدنا ولا بتخلينا نعرف ناخد إجراء حاسم ، بل بالعكس بتصيبنا بالاحباط وبتخلينا نحس بعض الاحيان ان مجهودنا بيضيع . احنا وضحنا كتير ان فرق المتابعه والمفتشين منتشرين علي الشواطئ…وبسبب اننا مش حنقدر نعين مفتش علي كل شاطئ من ابو قير لغاية سيدي كرير….احنا خططنا ان كل شاطئين متجاورين يكون عليهم مفتش . المفتشين بيتلقوا البلاغات من قسم الاعلام وبيروحوا للمكان اللي فيه صاحب الشكوي.. وبيقدروا يحلوا المشكلة بشكل يرجع لكل صاحب حق حقه ، وكمان المخالف يتحاسب. احنا عارفين ان عندنا مشاكل كتير…..اهمها قلة المساحات الرملية علي الشواطئ وخاصة بالقطاع الشرقي وبالتالي قلة عدد وحدات الحمامات ، ومع الاعداد الرهيبة الموجودة علي الشاطئ وبعض السلوكيات السيئة أكيد لازم كلنا ما نكونش راضيين عن حالة الحمامات ، ووحدات تغيير الملابس مش أحسن حاجة علشان كده عايزين الشكوي تكون محددة.احنا ارقامنا شغالة علي مدار ٢٤ ساعه بتستقبل الشكاوي.بنرجو من جميع الرواد قبل كتابه اي تعليق ممكن يؤثر بالسلب ، وينشر الاحباط ، ان يتم التعامل بإيجابية مع أي مشكله بتواجهك بمعني اذا واجهتك اي مشكله علي الشاطئ اتصل بينا فورا حتلاقي مسؤول من الاداره بيتعامل مع المشكله ولو ده محصلش ، حضرتك ليك كل الحق في ارسال شكوي تكون مصحوبه بإسم الشاطئ وميعاد الزياره والاجراء اللي حضرتك اتخذته لمواجهة المشكله ، ساعتها حنقدر نعرف مين مقصر في شغله و حنعرف نحط ايدينا علي المشكله ونقدر نحلها .لازم كلنا نتعاون …السلبيات والظواهر السيئة تراكمت في سنين ، وحلها مش مستحيل طالما توافرت إرادة التغيير.احنا عايزين شواطئنا متحضرة وراقية وتحترم المواطن ، ولن نتراجع عن تحقيق هذا الهدف بس لازم نتعاون.