البوست ده مخصوص لكل اللي بيحبوا اسكندرية من المحافظات الاخري.
وزى ما فيه مغرمين باسكندرية فى أيام الصيف ..فيه برضه كثير بيعشقوها فى الشتاء ..
اجازة نصف السنة قربت…وناس كتير بتحب تهرب من ضغوط الحياة وترتاح من جو الامتحانات ، وتيجي اسكندرية ، عشان يتمشوا ع البحر ويلفوا فى شوارعها بعد ما الشتا يغسلها ، ويشموا ريحة المطر اللي مافيش زيها غير عندنا ، ويدفوا نفسهم بأطعم كوباية سحلب وحمص الشام بالليمون… وبعدين يتغدوا باحلي اكلة سمك ويحلوا بجيلاتي ويتصوروا ويعيشوا اجمل ذكريات…
اسكندرية فى الشتا مختلفة وجميلة وتستحق الزيارة.
اسكندرية زي امرأة اربعينية تتحلي بالجمال ..والعقل.. والوقار.. اسكندرية ساحرة .
، زي ما استمتعتم ببحرنا ف الصيف، جربوا وزورونا ف الشتا….
زى ما احنا لينا إشراف علي الشواطئ والكافتريات والمطاعم وساعدناكم الصيف اللي فات ، احنا كمان بنتابع الفنادق الغير مقيمة سياحيا ، بنوعدكم بإقامة رائعة ، وأكيد حنكون معاكم لو واجهتكم اي مشكلة.
بالمناسبة..فيه من الفنادق اللي موقعها مميز علي الكورنيش مباشرة وعندنا كمان فنادق عتيقة و لها خلفية تاريخية ف وسط البلد ، وكمان عندنا فنادق شعبية وسط المناطق التجارية واللي تكلفة الاقامة فيها معقولة .
وعشان انت تهمنا ، حبينا نساعدك لو حبيت تظبط ميزانيتك وتنزل اسكندرية يومين.
فريق من ادارة السياحة قام بعمل حصر لكل فنادق المدينة الخاضعة لإشراف الإدارة المركزية للسياحة والمصايف ، وتم تحديث بياناتها علي موقع الإدارة الرسمى
www.catr.gov.eg
مجرد ما تدخل على الموقع هتلاقي فنادق كتيرة… واسعارها معقولة جدا.
احنا زودنا الموقع بخرايط للوصول للفنادق ديه، وحطينا ارقام تليفوناتها وصور ليها ….وكمان صور الريسبشنز والغرف كنوع من التيسير علي حضراتكم عشان تقدروا تحددوا اختياراتكم .
وكمان احنا حاليا شغالين في تجميع باقي البيانات وبنعتمد ونجدد باقي قوائم اسعار الاقامة بالغرف .
ومنتظرين حضراتكم فى الاسكندرية وتشاركونا بصوركم وذكرياتكم .
مع تحيات العلاقات العامه والاعلام.
الادارة المركزية للسياحة والمصايف.