كلنا انبهرنا امبارح بافتتاح المتحف المصري الكبير.. أكبر صرح بيعرض آثار في العالم!
بس إحنا الإسكندرانية.. قلبنا دق وعيوننا لمعت لما فجأة لون الشاشات اتحول للون الموج الأزرق 🌊.. و سمعنا جملة:
“بناها الإسكندر الأكبر” 🌊💙
🥰إسكندرية.. حكاية عراقة على ضفاف البحر..
دي أول مدينة تحمل ملامح الحضارة اليونانية على أرض مصر، ومن بعدها الرومان، واللي لحد النهاردة آثارهم بتشهد على عظمتهم.
من عمود السواري اللي واقف شامخ، لمسرح كوم الدكة الروماني اللي لسه بيسمع صدى ضحكات الجمهور من آلاف السنين.. ومن مقابر كوم الشقافة اللي واخدة لقب “عجيبة الدنيا الثامنة”، لتفاصيل المتحف اليوناني الروماني اللي بيحكي تاريخ مدينة ما بتغيبش عنها الشمس ولا الحضارات.
🎼 إسكندرية كمان سابت بصمة كبيرة في الاحتفال وحضرت بقوة 💪
من أول وزير الثقافة الأسبق الإسكندراني “فاروق حسني”، صاحب فكرة إنشاء المتحف المصري الكبير،
والمايسترو العالمي “ناير ناجي”،
مع المايسترو “دنيا الدغيدي” خريجة مدرسة سان چان انتيد و اول قائد اوركسترا في مصر و الشرق الأوسط، مع الأوركسترا المميزة المكونة من ٣٠ عازف كلهم مصريين متعونا بمؤلفات مختلفة في بداية الاحتفال و طبعا السوبرانو الهايلة “شيرين طارق” اللي أبدعت بصوتها المميز.
📍النهاردة إسكندرية.. اللي طول عمرها فاتحة حضنها للسائحين والزوار من كل حتة في العالم، بقت ليها فرصة ذهبية تتحط بقوة تاني على خريطة السياحة المصرية، خصوصًا بعد ما اسمها اتقال بصوت عالي قدام العالم كله!
3377f3a6-2a87-48b4-a395-587a9e1ae2a0
💐💐فلو لسه مازرتش إسكندرية .. ده وقتها!
تعالى شوف تاريخها، شم هواها.. اسبح في بحرها، و استمتع بكل زاوية من زواياها اللي مليانة روح وحكاية.
إسكندرية مش بس مدينة.. إسكندرية تاريخ 💙🌍
Hits: 83