🌊 إسكندرية دايما ولّادة هتلاقي أولادها مشرفينها في كل المجالات 📚 من التاريخ للأدب 📖 والفن والرياضة 🥇
والنهاردة هنتكلم عن واحد من ولاد اسكندرية اللي رفع إسمها في كرة القدم ⚽
👳 يمكن اصله نوبي لأن أسرته من النوبة الجميلة لكن هو اتولد هنا في اسكندرية وبدايته كانت في قلب أندية اسكندرية 🥅⛳ عارفين بنتكلم عن مين.. عن الجوهرة السمراء
✨ الكابتن أحمد الكأس ✨
⭐ تعالوا نتعرف عليه اكتر..
📝 اسمه أحمد عبده عبد العزيز عبد الله اتولد سنة ١٩٦٥ في محرم بك ولأن النادي الأوليمبي كان قريب من بيته دخل فيه اختبارات الناشئين ولأنه لاعب ماهر ومميز وصل إنه يلعب في الفريق الأول للنادي 🥅
🥇ونجح في النادي الأوليمبي ٣ مرات متتالية إنه يحقق لنفسه لقب هداف الدوري المصري في مواسم (١٩٩١-١٩٩٢) و (١٩٩٢-١٩٩٣) و (١٩٩٣-١٩٩٤) ونقدر نقول انه من اللاعبين القليلين اللي قدروا يحققوا لنفسهم اللقب ده في ٣ مواسم متتالية 💥
⚽ ساهم في صعود النادي الأوليمبي لدوري الدرجة الثانية بعد هبوطه بقرار من اتحاد الكرة وسجل مع النادي الأوليمبي ٧٨ هدف في الدوري الممتاز
⚽ وفي سنة ١٩٩٥ اتنقل لنادي الزمالك ولعب موسمين وبعدها اتنقل لنادي الإتحاد السكندري ولعب موسمين ورجع نادي الزمالك تاني سنة ٢٠٠٠ وفي نادي الزمالك حقق بطولة كأس الأندية الأفريقية أبطال الدوري سنة ١٩٩٦ وكأس السوبر الإفريقي سنة ١٩٩٧ وحقق ٥ أهداف في المشاركات الإفريقية و ٢٥ هدف في بطولة الدوري المصري.
⚽ في المنتخب المصري لكرة القدم لعب ١١٢ مباراة من سنة ١٩٨٧ حتى ١٩٩٧ مباراة وكان واحد من أبطال المونديال التاريخي سنة ١٩٩٠ وصنع اسيست لحسام حسن في كره التأهل لكاس العالم ٩٠ وحقق فيها جايزة رجل المباراة اللي كانت مع هولندا واستقبل عرض مغري من تشيلسي الإنجليزي بعد كأس العالم ٩٠ لكن رفض بسبب والدته وإرتباطه بأسرته
🏆 وحقق مع المنتخب بطولة كأس العرب سنة ١٩٩٢
🏆 وحقق مع المنتخب العسكري بطولة كأس العالم العسكرية سنة ١٩٩٣
🥅⚽ سجل ٢٥ هدف دولي منهم ٣ أهداف في كأس الأمم الأفريقية سنة ١٩٩٦ في جنوب أفريقيا.
💯 ⚽ الجوهرة السمراء أحمد الكأس دخل نادي المائة بالدوري المصري (يعني اللي احرز ١٠٠ هدف واكتر) وهو احرز ١٠٧ هدف ٧٨ هدف مع النادي الأوليمبي و ٢٥ هدف مع نادي الزمالك و ٤ أهداف مع نادي الإتحاد السكندري
📌 من سنة ٢٠٢٣ الكابتن أحمد الكأس هو المدير الفني لمنتخب مصر من الناشئين مواليد ٢٠٠٨
اخيرا ليه أطلقوا عليه أحمد الكأس ⁉️
لأنه كان شبهه نجم الأوليمبي السابق محمد الكأس ولأن الناس حبته قالت عليه نفس الاسم ومن ساعتها وهو الكابتن المحبوب أحمد الكأس ✨
Hits: 1